കക്കട്ടില്‍: ഇലക്ട്രിക്കല്‍ സെക്ഷന്‍ ഓഫിസ് കൈയേറി ഓവര്‍സിയറെയും ലൈന്‍മാന്‍മാരെയും ഓഫിസിനുള്ളില്‍ പൂട്ടിയിട്ട സംഭവത്തില്‍ കേസെടുക്കാതിരിക്കുന്നതിനെതിരേ കേരള ഇലക്ട്രിസിറ്റി എംപ്ലോയീസ് കോണ്‍ഫെഡറേഷന്‍ ഡിവിഷന്‍ കമ്മിറ്റി ശക്തമായി പ്രതിഷേധിച്ചു.
സംഭവം കഴിഞ്ഞ് രണ്ടാഴ്ചയായിട്ടും പൊലിസ് കേസെടുക്കുകയോ എഫ്.ഐ.ആര്‍ രജിസ്റ്റര്‍ ചെയ്യുകയോ ചെയ്തിട്ടില്ല. കേസ് ഒത്തുതീര്‍ക്കാനും മായ്ച്ചു കളയാനും ചിലര്‍ രഹസ്യമായി ശ്രമിക്കുന്നതിനെ ജീവനക്കാരെ അണിനിരത്തി പ്രതിരോധിക്കുമെന്ന് ഡിവിഷന്‍ ഭാരവാഹികള്‍ അറിയിച്ചു.
തുടര്‍ച്ചയായി രണ്ട് ദിവസത്തോളം വൈദ്യുതി മുടങ്ങിയത് പരാതിപ്പെടാനെത്തിയവര്‍ ജീവനക്കാരോട് കയര്‍ത്തു സംസാരിക്കുകയും ഓഫിസ് പുറത്ത്‌നിന്ന് ഷട്ടര്‍ താഴ്ത്തി പൂട്ടി ഇടുകയും ചെയ്തതാണ് കേസിനാസ്പദമായ സംഭവം.