ന്യൂഡല്‍ഹി: നോട്ടു നിരോധനം പ്രധാനമന്ത്രി നരേന്ദ്ര മോദിയുടെ സ്വന്തം താല്‍പര്യപ്രകാരമാണ് നടത്തിയതെന്നതിന് കൂടുതല്‍ തെളിവുകള്‍ പുറത്ത്. ആര്‍.ബി.ഐയുടെ അംഗീകാരം പോലും ലഭിക്കാതെയാണ് 2016 നവംബര്‍ എട്ടിന് നോട്ടു നിരോധനം നടപ്പിലാക്കിയതെന്ന് വിവരാവകാശ രേഖകള്‍ വ്യക്തമാക്കുന്നു.

വിവരാവകാശ പ്രവര്‍ത്തകന്‍ വെങ്കടേഷ് നായിക്കാണ് ആര്‍.ബി.ഐയുടെ മിനിട്‌സ് അടക്കമുള്ള രേഖകള്‍ പുറത്തുവിട്ടിരിക്കുന്നത്. നോട്ട് നിരോധനം പ്രഖ്യാപിക്കുന്നതിന് രണ്ടര മണിക്കൂര്‍ മുന്‍പ് മാത്രമാണ് അംഗീകാരത്തിനായി ആര്‍.ബി.ഐയില്‍ എത്തിയത്. അന്നു ഗവര്‍ണറായിരുന്ന ഊര്‍ജിത്ത് പട്ടേലിന്റെ ബോര്‍ഡ് ഇതു പരിഗണനയ്ക്കു വയ്ക്കുമ്പോഴേക്കും 1000, 500 രൂപയുടെ നോട്ടുകള്‍ പിന്‍വലിച്ചുകഴിഞ്ഞു.

കള്ളപ്പണം, വ്യാജനോട്ട് എന്നിവയെ ഇല്ലാതാക്കാന്‍ നോട്ട് നിരോധനം സഹായിക്കുമോയെന്ന ആശങ്ക ബോര്‍ഡ് ഉന്നയിച്ചതായും മിനുട്‌സില്‍ വ്യക്തമാക്കുന്നു. കള്ളപ്പണത്തില്‍ ഭൂരിപക്ഷവും സ്വര്‍ണമായോ, റിയല്‍ എസ്‌റ്റേറ്റ് നിക്ഷേപത്തിന്റെ രൂപത്തിലോ ആണെന്ന നിഗമനത്തിലാണ് ആര്‍.ബി.ഐ. അത്തരം സമ്പത്തില്‍ നോട്ടുനിരോധനത്തിന് യാതൊരു പ്രതിഫലനും സൃഷ്ടിക്കാനാവില്ലെന്നും ആര്‍.ബി.ഐ ചൂണ്ടിക്കാട്ടിയിരുന്നു.

ഡിസംബര്‍ 16നാണ് റിസര്‍വ്വ് ബാങ്ക് കേന്ദ്ര നിര്‍ദേശത്തിന് അംഗീകാരം നല്‍കിക്കൊണ്ട് ഫയല്‍ സര്‍ക്കാറിന് തിരിച്ചയച്ചത്. അതായത് നോട്ടുനിരോധം പ്രഖ്യാപിച്ച് 38 ദിവസങ്ങള്‍ക്കുശേഷം.

2016 നവംബര്‍ എട്ടിന് വൈകുന്നേരം 5.30ന് നടന്ന ആര്‍.ബി.ഐ ബോര്‍ഡിന്റെ യോഗത്തിന്റെ മിനുട്‌സാണ് വിവരാകാശ നിയമത്തിലൂടെ പുറത്തുവന്നത്. ആദ്യം ആര്‍.ബി.ഐ രേഖകള്‍ കൈമാറാന്‍ വിസമ്മതിച്ചിരുന്നു.

അതേസമയം, കള്ളപ്പണം തിട്ടപ്പെടുത്താനുള്ള ചുമതല ലഭിച്ച എന്‍.ഐ.പി.എഫ്.പിയും മറ്റ് രണ്ട് സംഘടനകളും സമര്‍പ്പിച്ച കള്ളപ്പണത്തെക്കുറിച്ചുള്ള റിപ്പോര്‍ട്ട് നോട്ടുനിരോധനവുമായി ബന്ധപ്പെട്ട മിനുട്‌സില്‍ പരാമര്‍ശിക്കുന്നില്ല.