ലണ്ടന്‍: പാര്‍ലമെന്റിലെ വോട്ടെടുപ്പ് ബ്രക്‌സിറ്റില്‍ ബ്രിട്ടന്റെ വിധിയെഴുത്താവും. ബ്രിട്ടന്‍ യൂറോപ്യന്‍ യൂനിയന്‍ വിടുന്നതുമായി ബന്ധപ്പെട്ട് തെരേസാ മേ സര്‍ക്കാര്‍ മുന്നോട്ടുവച്ച കരാറിലാണ് വോട്ടെടുപ്പ് നടക്കുന്നത്. ജനുവരിയില്‍ പാര്‍ലമെന്റ് തള്ളിയ കരാറില്‍ മാറ്റങ്ങള്‍ വരുത്തിയാണ് അവതരിപ്പിക്കുന്നതെന്നാണ് പ്രധാനമന്ത്രി തെരേസാ മേയുടെ അവകാശ വാദം.
തെരേസാ മേ അവതരിപ്പിക്കുന്ന പുതിയ കരാര്‍ തള്ളപ്പെടുകയാണെങ്കില്‍ ഈ മാസം 29ന് ഉടമ്പടിയില്ലാതെ ബ്രിട്ടന്‍ ഇ.യു വിടും.
അല്ലെങ്കില്‍ പിന്‍വാങ്ങല്‍ തിയതി നീട്ടും. കൂടാതെ ബ്രിട്ടന്‍ ഇ.യു വിടേണ്ടത് കരാറോടെയാണോ, അതല്ലാതെയാണോ എന്നതില്‍ ഒരു വോട്ടെടുപ്പ് കൂടി ഇന്നുണ്ടാവും. അതില്‍ ഉടമ്പടിയല്ലാതെ ബ്രക്‌സിറ്റ് വിടാനാണ് പാര്‍ലമെന്റ് അംഗങ്ങള്‍ വോട്ട് ചെയ്യുന്നതെങ്കില്‍ ഈ മാസം കരാറില്ലാതെ ഇ.യു വിടും.

ഉടമ്പടിയുള്ള ബ്രക്‌സിറ്റാണ് അംഗങ്ങളുടെ ആവശ്യമെങ്കില്‍ ഇ.യു വിടാനുള്ള തിയതി നീട്ടാന്‍ ആവശ്യപ്പെടണമോ എന്നതില്‍ ഒരു വോട്ടെടുപ്പ് കൂടിയുണ്ടാവും. കരാര്‍ പാസാവുകയാണെങ്കില്‍ ഈ മാസം 29ന് തന്നെ സാങ്കേതികമായി ബ്രിട്ടന്‍ ഇ.യു വിടും.
2020 ഡിസംബര്‍ വരെ നിലവിലെ അവസ്ഥ തുടരും. എന്നാല്‍ വോട്ടെടുപ്പിന്റെ അവസാന മണിക്കൂറുകള്‍വരെ പാര്‍ലമെന്റ് അംഗങ്ങള്‍ക്കിടയില്‍ സമാവായമുണ്ടാക്കാന്‍ തെരേസാ മേക്ക് സാധിച്ചിരുന്നില്ല.