രാജാക്കാട്: മമ്മട്ടിക്കാനം കുരിശുപടി ഭാഗത്ത് തെരുവ് നായ ശല്യം രൂക്ഷമാകുന്നു. നിരവധി വളര്‍ത്തുമൃഗങ്ങളെ തെരുവുനായ്ക്കള്‍ കടുച്ചുകൊന്നു.
തെരുവ് നായ്ക്കളുടെ ശല്യം ഇല്ലാതാക്കുന്നതിന് അടിയന്തര നടപടി സ്വീകരിക്കണമെന്ന് ആവശ്യപ്പെട്ട് നാട്ടുകാര്‍ രംഗത്തെത്തി.
രാജാക്കാട് പഞ്ചായത്തില്‍ തെരുവ് നായ്ക്കളുടെ ശല്യം രൂക്ഷമായി നില്‍ക്കുന്ന പ്രദേശമാണ് മമ്മട്ടിക്കാനം കുരിശുംപടി മേഖല. നായ്ക്കളുടെ ശല്യത്തിന് പരിഹാരം കാണണമെന്ന് കാണിച്ച് നാട്ടുകാര്‍ ബന്ധപ്പെട്ട് അധികൃതര്‍ക്ക് പരാതി നല്‍കിയെങ്കിലും വേണ്ട നടപടിയുണ്ടായിട്ടുമില്ല.
കഴിഞ്ഞ ഒരാഴ്ച്ചയ്ക്കുള്ളില്‍ ആടും കോഴിയും അടക്കമുള്ള നിരവധി വളര്‍ത്തു മൃഗങ്ങലാണ് തെരുവ്‌നായയുടെ ആക്രമണത്തില്‍ ചത്തിട്ടുള്ളത്. മമ്മട്ടിക്കാനം പാലക്കാട്ട് ജോയിയുടെ കൂട്ടില്‍ നിന്നിരുന്ന ആടിനെ കഴിഞ്ഞ ദിവസം ഏട്ടോളം തെരുവ്‌നായ്ക്കള്‍ ചേര്‍ന്ന് അക്രമിച്ച് കൊന്നിരുന്നു. വീട്ടുമുറ്റത്തെ കോഴിക്കൂട് തകര്‍ത്ത നായ്ക്കള്‍ കോഴികളെയും കൊന്ന് തിന്നു.
ഇന്നലെ മമ്മട്ടിക്കാനം കുമ്പളാംതടത്തില്‍ മണിയുടെ വീട്ടുമുറ്റത്ത് കെട്ടിയിട്ടിരുന്ന ഒരുവയസ് പ്രായമായ ആട്ടിന്‍കുഞ്ഞിനെ നാലോളം നായ്ക്കള്‍ ചേര്‍ന്ന് അക്രമിച്ചു. കഴുത്തിനും മുതുകിനും സാരമായി പരിക്കേറ്റ ആടിനെ രാജാക്കാട് മൃഗാശുപത്രിയില്‍ നിന്നും ഡോക്ടറെത്തി ചികിത്സ നല്‍കി.
തെരുവ് നായ്ക്കളുടെ ശല്യം രൂക്ഷമായതോടെ കുട്ടികളെയടക്കം പുറത്തിറക്കുവാന്‍ കഴിയാത്ത സാഹചര്യമാണ് പ്രദേശത്തുള്ളത്. അടിയന്തിരമായി തെരുവ്‌നായ്ക്കളുടെ ശല്യം പരിഹരിക്കുന്നതിന് വേണ്ട നടപടി സ്വീകരിക്കണമെന്നാണ് നാട്ടുകാരുടെ ശക്തമായ ആവശ്യം.