വൈക്കം: ശമ്പളപരിഷ്‌ക്കരണം നടപ്പിലാക്കാത്തില്‍ പ്രതിഷേധിച്ച് 27ന് തിരുവനന്തപുരത്ത് സെക്രട്ടറിയേറ്റിന് മുന്നില്‍ കൂട്ടധര്‍ണ നടത്തുവാന്‍ കേരള സ്റ്റേറ്റ് മുന്‍സിപ്പല്‍ കോര്‍പ്പറേഷന്‍ വര്‍ക്കേഴ്‌സ് ഫെഡറേഷന്‍ (എ.ഐ.ടി.യു.സി) തീരുമാനിച്ചു.
2014 ജൂലൈ ഒന്ന് മുതല്‍ നടപ്പിലാക്കേണ്ടുന്ന കേരളത്തിലെ നഗരസഭകളില്‍ ശുചീകരണ ജോലികള്‍ ചെയ്യുന്ന കണ്ടിജന്റ് ജീവനക്കാരുടെ ശമ്പളപരിഷ്‌ക്കരണം ഇതുവരെ നടപ്പിലാക്കിയിട്ടില്ല.
ശമ്പളപരിഷ്‌ക്കരണ നടപടികള്‍ പൂര്‍ത്തീകരിച്ചിട്ടും പ്രഖ്യാപിക്കാതെ കഴിഞ്ഞ യു.ഡി.എഫ് സര്‍ക്കാര്‍ വഞ്ചനാപരമായ നിലപാടാണ് സ്വീകരിച്ചത്. തൊഴിലാളികള്‍ ഏറെ പ്രതീക്ഷയോടെ കാണുന്ന എല്‍.ഡി.എഫ് സര്‍ക്കാര്‍ ശമ്പളപരിഷ്‌ക്കരണം പ്രഖ്യാപിക്കുന്നതില്‍ കാലതാമസം ഉണ്ടാക്കുന്നതില്‍ യാതൊരു ന്യായീകരണവുമില്ലെന്നും യോഗം കുറ്റപ്പെടുത്തി.
ഈ സാഹചര്യത്തിലാണ് സെക്രട്ടറിയേറ്റിനുമുന്നില്‍ ധര്‍ണ നടത്തുവാന്‍ ഫെഡറേഷന്‍ തീരുമാനിച്ചത്. എ.ഐ.ടി.യു.സി സംസ്ഥാന ജനറല്‍ സെക്രട്ടറി കെ.പി രാജേന്ദ്രന്‍ ധര്‍ണ ഉദ്ഘാടനം ചെയ്യുമെന്ന് ഫെഡറേഷന്‍ നേതാക്കള്‍ അറിയിച്ചു.
യോഗത്തില്‍ പ്രസിഡന്റ് കെ.ജി പങ്കജാക്ഷന്‍ അധ്യക്ഷത വഹിച്ചു. ജനറല്‍ സെക്രട്ടറി ഡി.രഞ്ജിത്കുമാര്‍, പി.എസ് നായ്ഡു, എ.ടി വര്‍ഗീസ്, എസ്.അജിത്ത് എന്നിവര്‍ പ്രസംഗിച്ചു.