താമരശേരി: 14 പേരുടെ മരണത്തിനും നൂറോളം കുടുംബങ്ങളെ അഭയാര്‍ഥികളാക്കുന്നതിനും കാരണമായ കട്ടിപ്പാറ കരിഞ്ചോലമല ദുരന്തത്തിലെ ഉത്ഭവ കേന്ദ്രത്തിലേത് ഞെട്ടിപ്പിക്കുന്ന കാഴ്ച. രാവിലെ 10ഓടെയാണ് സബ്കലക്ടര്‍ വി. വിഘ്‌നേശ്വരിയുടെ നേതൃത്വത്തില്‍ പത്തോളം ഉദ്യോഗസ്ഥ സംഘം ഉരുള്‍പൊട്ടല്‍ നടന്ന മലയിലെ ഉത്ഭവസ്ഥാനത്ത് പരിശോധന നടത്തിയത്. 10.30ഓടെ 75 ഡിഗ്രിയോളം ചെരിഞ്ഞതും കുത്തനെയുള്ളതുമായ അരക്കിലോ മീറ്ററിനടുത്ത് ദൂരം സഞ്ചരിച്ച് സംഘം പ്രഭവ കേന്ദ്രത്തിലെത്തി. ഇവിടെ കണ്ട കാഴ്ച കൂറ്റന്‍ പാറ അടര്‍ന്നു വീണ് മലയില്‍ നിര്‍മാണ പ്രവൃത്തി നടക്കുന്നിടത്ത് പതിച്ചു നില്‍ക്കുന്നതായിരുന്നു. ശക്തമായ മഴയും മണ്ണൊലിപ്പും തുടര്‍ന്നാല്‍ ഏതു സമയവും ഈ പാറ താഴ്ഭാഗത്തേക്കു പതിക്കാനുള്ള സാധ്യത കൂടുതലാണ്.
ഇതുപോലെയുള്ള കൂറ്റന്‍ പാറകള്‍ മലയുടെ പല ഭാഗങ്ങളിലുമുണ്ട്. മലയടിവാരത്ത് അവശേഷിക്കുന്ന വീടുകള്‍ക്ക് വലിയ പാറക്കൂട്ടങ്ങള്‍ ഭീഷണിയാണ്. ഉരുള്‍പൊട്ടലിന്റെ പ്രഭവകേന്ദ്രവും നിര്‍മാണ പ്രവൃത്തി നടക്കുന്ന സ്ഥലവും തമ്മില്‍ ഏകദേശം 10 മീറ്ററോളം മാത്രമാണ് ദൂരവ്യത്യാസമുള്ളത്. ഇവിടേക്ക് അതിസാഹസികമായാണ് കംപ്രസര്‍ അടക്കമുള്ള യന്ത്രങ്ങളും മണ്ണുമാന്തി യന്ത്രവും മറ്റുപകരണങ്ങളും എത്തിച്ചിരുന്നത്. സ്ഥലത്ത് വലിയ രീതിയില്‍ പാറ പൊട്ടിച്ചതായി ഉദ്യോഗസ്ഥര്‍ പറഞ്ഞു.
ഇലക്ട്രിക് ഡിക്റ്റണേറ്റര്‍ ഉപയോഗിച്ച് പാറക്കൂട്ടങ്ങള്‍ പൊട്ടിച്ചതായും വ്യക്തമായിട്ടുണ്ട്. ശബ്ദം ഉണ്ടാകില്ലെന്നതാണ് ഇതിന്റെ പ്രത്യേകത. ഇത്തരത്തില്‍ പാറ പൊട്ടിച്ചതിന്റെ അടയാളങ്ങള്‍ ഉരുള്‍പൊട്ടലിനു ശേഷവും ഇവിടുത്തെ പാറക്കൂട്ടങ്ങളില്‍ മായാതെ കിടക്കുകയാണ്. നിര്‍മാണ പ്രവൃത്തി നടന്ന സ്ഥലത്ത് ഉപയോഗിച്ച സ്‌ഫോടനത്തിന്റെ പ്രകമ്പനം കാരണം മലയിലെ പാറക്കൂട്ടങ്ങള്‍ക്ക് വ്യതിയാനം സംഭവിച്ചതാകാം ദുരന്തത്തിന്റെ പ്രധാന കാരണമെന്നാണ് വിലയിരുത്തല്‍. ഏറ്റവും മുകളില്‍ നിന്നുവന്ന പാറക്കൂട്ടങ്ങള്‍ നിര്‍മാണ പ്രവൃത്തി നടക്കുന്ന ഭാഗത്ത് എത്തിയതിനു ശേഷം മൂന്നായി തിരിയുകയും നേരെയുള്ള ഭാഗത്തിലൂടെ പാറക്കൂട്ടങ്ങള്‍ ചെന്ന് നാലു വീടുകള്‍ തകര്‍ക്കുകയുമാണുണ്ടായത്. രണ്ടാമത്തെയും മൂന്നാമത്തെയും ഭാഗങ്ങള്‍ മലയുടെ ഇടതു ഭാഗത്തേക്കും വലതു ഭാഗത്തേക്കും പൊട്ടി താഴേക്കു പതിക്കുകയായിരുന്നു.
ഉത്ഭവം നടന്ന സ്ഥലത്ത് തറയില്‍ നിന്ന് 10 മീറ്ററിലധികം ഉയരത്തിലുള്ള വന്‍ പാറക്കൂട്ടങ്ങളും സമീപത്തെ വന്‍ മരങ്ങളും വലിയ ശബ്ദത്തോടെ തകര്‍ന്നാണ് താഴേക്കു പതിച്ചത്.