ജിദ്ദ: മൊബൈല്‍ ഫോണ്‍ മേഖലയിലെ സ്വദേശിവല്‍കരണത്തിന് ശേഷം വിവിധ വകുപ്പുകള്‍ സഹകരിച്ച് നടത്തിയ പരിശോധനകളില്‍ 2,187 നിയമ ലംഘനങ്ങള്‍ കണ്ടെത്തി. ഇതുമായി ബന്ധപ്പെട്ട് 1,981 സ്ഥാപനങ്ങള്‍ക്കെതിരേ ശിക്ഷാ നടപടി കൈക്കൊള്ളാന്‍ ബന്ധപ്പെട്ട സമിതിക്ക് കൈമാറി. വിവിധ മേഖലകളില്‍ 206 സ്ഥാപനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്. ആഭ്യന്തരം, വാണിജ്യം, മുനിസിപ്പാലിറ്റി, ടെലികോം എന്നിവയുമായി സഹകരിച്ച് ഈ രംഗത്തു പരിശോധന തുടരുമെന്നും നിയമലംഘനം ശ്രദ്ധയില്‍പെട്ടാല്‍ വിവരമറിയിക്കണമെന്നും തൊഴില്‍-സാമൂഹിക വികസന മന്ത്രാലയ അധികൃതര്‍ അറിയിച്ചു.
സെപതംബര്‍ രണ്ട് മുതലാണ് മൊബൈല്‍ ഫോണ്‍ കടകളില്‍ സമ്പൂര്‍ണ സ്വദേശിവല്‍കരണം നിര്‍ബന്ധമാക്കിയത്. സെപ്തംബര്‍ രണ്ടു മുതല്‍ ഏപ്രില്‍ രണ്ടു വരെയുള്ള എട്ടു മാസക്കാലത്ത് 15,892 മൊബൈല്‍ ഫോണ്‍ കടകളിലാണ് പരിശോധന നടത്തിയത്. കിഴക്കന്‍ പ്രവിശ്യയില്‍ 3,226 ഉം റിയാദില്‍ 2,086 ഉം മൊബൈല്‍ ഫോണ്‍ കടകള്‍ സമ്പൂര്‍ണ സ്വദേശിവല്‍കരണം നടപ്പാക്കിയതായി എട്ടു മാസത്തിനിടെ നടത്തിയ പരിശോധനയില്‍ വ്യക്തമായി. ഉത്തര അതിര്‍ത്തി പ്രവിശ്യയിലെ 170 മൊബൈല്‍ ഫോണ്‍ ഷോപ്പുകള്‍ സമ്പൂര്‍ണ സ്വദേശിവല്‍കരണം പാലിച്ചു.
കിഴക്കന്‍ പ്രവിശ്യയില്‍ 3,406, മക്ക പ്രവിശ്യയില്‍ 3,150, റിയാദില്‍ 2,527, അല്‍ ഖസീമില്‍ 1,905, അസീറില്‍ 1,449, മദീനയില്‍ 1,302മൊബൈല്‍ ഫോണ്‍ ഷോപ്പുകളില്‍ എട്ടു മാസത്തിനിടെ പരിശോധനകള്‍ നടത്തിയതായും അധികൃതര്‍ അറിയിച്ചു.