കോഴിക്കോട്: ജില്ലയില്‍ വിദ്യാര്‍ഥികള്‍ക്ക് സുഗമവും സുരക്ഷിതവുമായ യാത്ര ഉറപ്പു വരുത്തുന്നതിനും യാത്രാപ്രശ്‌നങ്ങള്‍ പരിഹരിക്കുന്നതിനും തീരുമാനം. ജില്ലാ ആസൂത്രണസമിതി കോണ്‍ഫറന്‍സ് ഹാളില്‍ ചേര്‍ന്ന വിദ്യാര്‍ഥികളുടെ യാത്രാ പ്രശ്‌ന പരിഹാരത്തിനുള്ള ജില്ലാ സമിതിയുടെ യോഗത്തിലാണ് തീരുമാനം.
സര്‍ക്കാര്‍, എയ്ഡഡ് മേഖലയിലുള്ള ഉന്നത വിദ്യാഭ്യാസ സ്ഥാപനങ്ങള്‍ ഒഴികെയുള്ളവക്ക് റീജ്യനല്‍ ട്രാന്‍സ്‌പോര്‍ട്ട് ഓഫിസര്‍ യാത്രാ ഇളവിന് പാസ് അനുവദിക്കും. ജൂലൈ 31നകം പുതിയ ബസ് പാസ് ആര്‍.ടി.ഒ നല്‍കും. അതുവരെ യാത്രാ ഇളവിന് നിലവിലുള്ള പാസ് മതിയാകും. ഞായറാഴ്ചകളിലും പൊതുഅവധി ദിവസങ്ങളിലും പഠന ആവശ്യങ്ങള്‍ക്ക് യാത്രാ ഇളവ് അനുവദിക്കും.
രാവിലെ ഏഴുമുതല്‍ രാത്രി ഏഴുവരെയാണ് യാത്രാ ഇളവ്. അതിരാവിലെ ക്ലാസുകള്‍ ആരംഭിക്കുന്ന വിദ്യാഭ്യാസ സ്ഥാപനങ്ങളിലെ വിദ്യാര്‍ഥികള്‍ക്ക് അതിന് അനുസൃതമായി യാത്രാ ഇളവ് നല്‍കും. ഹയര്‍ സെക്കന്‍ഡറി വരെയുള്ള വിദ്യാലയങ്ങളിലെ വിദ്യാര്‍ഥികള്‍ക്ക് സ്ഥാപന മേധാവികള്‍ നല്‍കുന്ന പാസ് ഉപയോഗിച്ച് യാത്രാ ഇളവ് അനുവദിക്കും. പാരലല്‍ കോളജ് വിദ്യാര്‍ഥികള്‍ക്ക് പരീക്ഷാ കേന്ദ്രങ്ങളിലേക്ക് ഹാള്‍ടിക്കറ്റുകളും പാസും കാണിച്ചാല്‍ യാത്രാ ഇളവ് നല്‍കും. വിദ്യാര്‍ഥികള്‍ക്ക് താമസസ്ഥലത്തുനിന്ന് വിദ്യാലയങ്ങളിലേക്കും തിരിച്ചുമാണ് പാസ് അനുവദിക്കുക. വിദ്യാര്‍ഥികളുടെ യാത്രാപ്രശ്‌നങ്ങള്‍ പരിഹരിക്കുന്നതിന് എല്ലാ വിദ്യാലയങ്ങളിലും സീനിയര്‍ അധ്യാപകരെ ജൂലൈ അഞ്ചിനകം നോഡല്‍ ഓഫിസര്‍മാരായി നിയമിക്കാനും യോഗം നിര്‍ദേശിച്ചു. കൂടുതല്‍ വിദ്യാര്‍ഥികളുള്ള സ്ഥാപനങ്ങള്‍ക്ക് സമീപം ട്രാഫിക് പൊലിസ് നിരീക്ഷണം ശക്തമാക്കും. സ്റ്റുഡന്റ് പൊലിസ് കേഡറ്റുകളുടെ സേവനവും പ്രയോജനപ്പെടുത്തും. വിദ്യാര്‍ഥികളും ബസ് ജീവനക്കാരും പരസ്പര ബഹുമാനത്തോടെ പെരുമാറിയാല്‍ പൂര്‍ണമായും പരിഹരിക്കാവുന്നതാണ് ജില്ലയിലെ വിദ്യാര്‍ഥികളുടെ യാത്രാപ്രശ്‌നങ്ങളെന്ന് യോഗത്തില്‍ എ.ഡി.എം പറഞ്ഞു. വിദ്യാര്‍ഥിനികളോട് അപമര്യാദയായി പെരുമാറിയാല്‍ പൊലിസ് കര്‍ശന നടപടി സ്വീകരിക്കുമെന്ന് അസി. പൊലിസ് കമ്മിഷണര്‍ വ്യക്തമാക്കി. സാമൂതിരി ഗുരുവായൂരപ്പന്‍ കോളജിലേക്കുള്ള യാത്രാപ്രശ്‌നത്തിന് പരിഹാരം കാണുന്നതിന് കൂടുതല്‍ കെ.എസ്.ആര്‍.ടി ബസ് ആവശ്യമാണെന്ന കാര്യം സര്‍ക്കാരിന്റെ ശ്രദ്ധയിലെത്തിക്കുമെന്ന് കെ.എസ്.ആര്‍.ടി.സി പ്രതിനിധി അറിയിച്ചു.
യോഗത്തില്‍ എ.ഡി.എം ടി. ജനില്‍കുമാര്‍ അധ്യക്ഷനായി. കോഴിക്കോട് ആര്‍.ടി.ഒ സി.ജെ പോള്‍സണ്‍ നടപടികള്‍ വിശദീകരിച്ചു. അസി. പൊലിസ് കമ്മിഷണര്‍ എം.സി ദേവസി, വടകര ആര്‍.ടി.ഒ വി.വി മധുസൂദനന്‍, കെ.എസ്.ആര്‍.ടി.സി ഇന്‍സ്‌പെക്ടര്‍ വി.എം ഉണ്ണി എന്നിവരും ബസ് ഉടമസ്ഥരുടെയും വിദ്യാര്‍ഥി സംഘടനകളുടെയും പാരലല്‍ കോളജ്, സ്വകാര്യ ഐ.ടി.ഐകള്‍ എന്നിവയുടെയും പ്രതിനിധികള്‍, സാമൂതിരി ഗുരുവായുരപ്പന്‍ കോളജ് അധ്യാപകര്‍, വിദ്യാര്‍ഥികള്‍ എന്നിവര്‍ പങ്കെടുത്തു.