കൊല്ലം: യു.പി.എ സര്‍ക്കാരിന്റെ കാലത്ത് നടപ്പാക്കിയ 'സ്വജല്‍ധാര' സമഗ്ര കുടിവെള്ള പദ്ധതിയുടെ താരിഫ് റേറ്റ് കൂട്ടിയത് ഉപഭോക്താക്കള്‍ക്ക് ഇരുട്ടടിയായി. കുടിവെള്ളം പമ്പു ചെയ്യുന്ന മോട്ടോര്‍ പ്രവര്‍ത്തിപ്പിക്കുന്നതിനുള്ള താരിഫ് റേറ്റ് യൂനിറ്റിന് ഒന്നര രൂപക്കു പകരം ഇനിമുതല്‍ 2.80 രുപ അടക്കണമെന്നാണ് താരിഫില്‍ പറയുന്നത്. തുക ഉപഭോക്താക്കളില്‍ നിന്നും ഈടാക്കാന്‍ യു.ഡി.എഫ് ഭരണകാലത്ത് വൈദ്യുതി ബോര്‍ഡ് തീരുമാനിച്ചിരുന്നെങ്കിലും പ്രതിഷേധത്തെ തുടര്‍ന്ന് ചാര്‍ജ് വര്‍ധന ഉപേക്ഷിക്കുകയായിരുന്നു.
ഇപ്പോള്‍ പുതിയ സര്‍ക്കാര്‍ 2013 മുതല്‍ മുന്‍കാല പ്രാബല്യത്തോടെ തുക അടയ്ക്കണമെന്നാവശ്യപ്പെട്ട് ഇന്ത്യന്‍ സൊസൈറ്റീസ് ആക്ട് പ്രകാരം രജിസ്റ്റര്‍ ചെയ്ത് പ്രവര്‍ത്തിക്കുന്ന പ്രാദേശിക കുടിവെള്ള യുനിറ്റുകള്‍ക്ക് നോട്ടീസ് അയച്ചു.

കുടിശികയും പിഴപ്പലിശയും അടയ്ക്കാന്‍ തയാറായില്ലെങ്കില്‍ വൈദ്യുതി വിഛേദിക്കുന്നതടക്കമുള്ള കടുത്ത നടപടികള്‍ സ്വീകരിക്കുമെന്ന ഭീഷണിയും നോട്ടീസിലുണ്ട്. കുടിവള്ളം ലഭ്യമല്ലാത്ത ഗ്രാമീണ മേഖലയിലെ അന്‍പതില്‍ കുറയാത്ത സാധാരണക്കാരായ ഉപഭോക്തൃ സംഘങ്ങള്‍ പിരിവെടുത്താണ് യൂനിറ്റുകളുടെ പ്രവര്‍ത്തനത്തിനും ജീവനക്കാര്‍ക്കുള്ള ശമ്പളം നല്‍കുന്നതിനും പണം കണ്ടെത്തുന്നത്.
200 മുതല്‍ 400 രൂപവരെ പ്രതിമാസം പിരിവെടുത്താണ് യൂനിറ്റുകള്‍ പ്രവര്‍ത്തിപ്പിക്കുന്നത്. സാങ്കേതിക തടസങ്ങളും പ്രവര്‍ത്തന വൈകല്യവും കാരണം പല സൊസൈറ്റികളും കടത്തിലാണ്. ഇത്തരത്തില്‍ പ്രതിസന്ധി നേരിടുമ്പോഴാണ് ബോര്‍ഡിന്റെ പുതിയ ഉത്തരവ് വന്നിട്ടുള്ളത്.
മുന്‍കാല പ്രാബല്യത്തോടെ ബില്‍ അടക്കേണ്ടിവരുമ്പോള്‍ വന്‍തുക പിരിവെടുക്കാന്‍ കഴിയാതെ വരും. ഇത്തവണത്തെ വര്‍ഷകാലം കഴിയുന്നതോടെ മിക്ക സൊസൈറ്റികളും അടച്ചു പൂട്ടേണ്ട അവസ്ഥയിലുമെത്തും. ഇതോടെ കോടികള്‍ ചെലവിട്ടു നിര്‍മിച്ച പദ്ധതികള്‍ വൈദ്യുതിയില്ലാതെ പെരുവഴിയിലാകും.