ജിദ്ദ: സഊദി സാംസ്‌കാരിക ആഘോഷങ്ങളുടെ സുപ്രധാന പരിപാടികളിലൊന്നായ സൂഖ് ഉക്കാദ് മേളക്ക് ഇന്നു തിരശീല ഉയരും. മേളയുടെ ഒരുക്കങ്ങള്‍ പൂര്‍ത്തിയായതായി സഊദി ദേശീയ ടൂറിസം പൈതൃക കമ്മീഷന്‍ അറിയിച്ചു. മേളയോടനുബന്ധിച്ച് നൂറിലേറെ വിവിധ പരിപാടികള്‍ ഒരുക്കീട്ടുണ്ടന്ന് കമ്മീഷന്‍ അധ്യക്ഷന്‍ സുല്‍ത്താന്‍ ബിന്‍ സല്‍മാന്‍ രാജകുമാരന്‍ പറഞ്ഞു.

തിരുഗേഹങ്ങളുടെ സേവകന്‍ സല്‍മാന്‍ രാജവിന് വേണ്ടി മക്ക ഗവര്‍ണര്‍ ഖാലിദ് അല്‍ ഫൈസല്‍ രാജകുമാരന്‍ മേള ഉദ്ഘാടന കര്‍മം നിര്‍വഹിക്കും. പുരാതന കാലം മുതലുള്ള പരിപാടികള്‍, നാടകങ്ങള്‍,പുരാതന ഉല്‍പ്പന്നങ്ങള്‍ വില്‍ക്കുന്ന മാര്‍ക്കറ്റ്, കായിക മത്സരം, കരകൗശല വസ്തുക്കളുടെ പ്രദര്‍ശനം, ലൈറ്റ് ആന്റ് ഷോ, വിനോദ മത്സരങ്ങള്‍, കവിത ചൊല്ലല്‍, സാംസ്‌കാരിക ശില്‍പശാല, അറബിക് കാലിഗ്രാഫി തുടങ്ങിയവ മേളയോടനുബന്ധിച്ച് നടക്കും. ഏഷ്യന്‍, യുറോപ്യന്‍, അമേരിക്കന്‍ ടൂറിസ്റ്റുകളുടെ 2200 പേരടങ്ങിയ അന്‍പതോളം സംഘം ഉക്കാദ് മേള സന്ദര്‍ശിക്കും. സഊദിയിലെ വിനോദ സഞ്ചാര കേന്ദ്രങ്ങളെ കുറിച്ച് പരിചയപ്പെടുത്താന്‍ 50 ഓളം ഫോട്ടോഗ്രാഫര്‍മാര്‍ പകര്‍ത്തിയ ചിത്രങ്ങള്‍ നഗരിയില്‍ പ്രത്യേകം തയ്യാറാക്കിയ സ്ഥലത്ത് പ്രദര്‍ശിപ്പിക്കും. തായിഫിലെ ചരിത്ര പുരാതന സ്ഥലമായ സൂഖ് ഉക്കാദ് സന്ദര്‍ശിക്കാന്‍ ജനങ്ങളെ പ്രോത്സാഹിപ്പിക്കുന്ന വിവിധ പൈതൃക, വിനോദ, സാംസ്‌കാരിക പരിപാടികള്‍ നടക്കും.

മക്ക, ജിദ്ദ, അല്‍ബാഹ, റിയാദ്, തായിഫ്, കിഴക്കന്‍ മേഖലകളിലും വിവിധങ്ങളായ പരിപാടികളാണ് മേളയുടെ പ്രചരണാര്‍ഥം ആവിഷ്‌കരിച്ചിരിക്കുന്നത്. ഒട്ടക കാഫിലകള്‍, കുതിരയോട്ടം, പരമ്പരാഗത നൃത്തങ്ങള്‍ തുടങ്ങിയ ഇതിലുള്‍പ്പെടും. ലോകത്തിന്റെ വിവിധഭാഗങ്ങളില്‍ നിന്ന് സാഹിത്യകാരന്മാര്‍, ബുദ്ധിജീവികള്‍, കവികള്‍, സാംസ്‌കാരിക പ്രവര്‍ത്തകര്‍, ചിന്തകന്‍ന്മാര്‍, വിദ്യാഭ്യാസ വിചക്ഷണര്‍ പങ്കെടുക്കും. സെമിനാറുകള്‍, പ്രഭാഷണങ്ങള്‍, രാജ്യാന്തര പ്രദര്‍ശനങ്ങള്‍ തുടങ്ങിയ പരിപാടികള്‍ക്കും മേള വേദിയാകും. ദേശീയ പൈതൃക ടൂറിസം വകുപ്പ് മേധാവി സുല്‍ത്താന്‍ ബിന്‍ സല്‍മാന്‍ രാജകുമാരന്റെ മേല്‍നോട്ടത്തിലാണ് ആഘോഷം നടക്കുന്നത്. മേള ജുലൈ 13ന് പരിസമാപ്തിയാകും.

കഴിഞ്ഞ വര്‍ഷത്തേക്കാള്‍ കൂടുതല്‍ സന്ദര്‍ശകര്‍ ഇക്കുറി മേള കാണുവാന്‍ എത്തുമെന്ന് പ്രതീക്ഷക്കുന്നതായി മേളയുടെ എക്‌സിക്യൂട്ടീവ് അബ്ദുല്ല അല്‍ സവാത്ത് പറഞ്ഞു. 3,94,718 പേര്‍ കഴിഞ്ഞ വര്‍ഷത്തേ ഉക്കാദ് മേള സന്ദര്‍ശിച്ചു. ഉക്കാദ് മേളയുടെ പ്രചരണാര്‍ഥം രാജ്യത്തിന്റെ വിവിധ മേഖലകളില്‍ വിവിധ പരിപാടികള്‍ നടത്തിയിരുന്നു. ഉക്കാദ് മേളയുടെ പ്രചരണാര്‍ഥം ആദ്യമായാണ് വിവിധ മേഖലകളില്‍ വ്യത്യസ്ത സാംസ്‌കാരിക വിനോദ പൈതൃക പരിപാടികള്‍ അരങ്ങേറുന്നത്.