#ശിഹാബ് പാറപ്പുറം

തൃശൂര്‍: സാംസ്‌കാരിക തലസ്ഥാനത്തെ പോരാട്ടത്തിന് ഇടത് - വലതു ക്യാംപുകള്‍ ഒരുങ്ങിക്കഴിഞ്ഞു. പൂരനഗരി മെഗാ പൂരത്തിന് മുന്‍പുള്ള തെരഞ്ഞെടുപ്പ് ചൂടിലാണിപ്പോള്‍. ആളും ആരവവും അകമ്പടിയേകുന്ന പൂരക്കാഴ്ചകളുടെ സമൃദ്ധിയോടെയാണ് സ്ഥാനാര്‍ഥികളുടെ പ്രചാരണം. സ്ഥാനാര്‍ഥി നിര്‍ണയം നേരത്തെ പൂര്‍ത്തിയാക്കി പ്രചാരണത്തിനിറങ്ങിയ ഇടത് സ്ഥാനാര്‍ഥി മണ്ഡലത്തിന്റെ പടിഞ്ഞാറന്‍ പ്രദേശങ്ങളില്‍ സ്വയം പരിചയപ്പെടുത്തുന്ന തിരക്കിലാണ്.

പരിചയപ്പെടുത്തലിന്റെ ആവശ്യമില്ലെങ്കിലും യു.ഡി.എഫ് സ്ഥാനാര്‍ഥി ടി.എന്‍ പ്രതാപന്‍ ഇന്നലെ പരമാവധി അടുപ്പക്കാരെ നേരില്‍ കണ്ടു. എല്ലാവരെയും തോളില്‍ തട്ടിയും ചേര്‍ത്തുപിടിച്ചും സ്‌നേഹവായ്പുകള്‍ നല്‍കിയും സഹായമഭ്യര്‍ഥിച്ചു. രാവിലെ വെട്ടുകാട് ക്രിസ്ത്യന്‍ പള്ളിയിലെ ഊട്ടു തിരുനാളിനെത്തിയ പ്രതാപന്‍ പുരോഹിതരില്‍നിന്ന് അനുഗ്രഹം വാങ്ങിയാണ് പ്രചാരണം ആരംഭിച്ചത്. വിശ്വാസികള്‍ അദ്ദേഹത്തിനായി 15 മിനിട്ടോളം നീളുന്ന പ്രാര്‍ഥനയും നടത്തി. തുടര്‍ന്ന് ചേര്‍പ്പ്, പടിഞ്ഞാറ്റുമുറി, ചിറക്കല്‍, ചൊവ്വൂര്‍ എന്നിവിടങ്ങളിലെത്തി വിവിധ ചടങ്ങുകളില്‍ പങ്കെടുത്തു. കഴിഞ്ഞ ദിവസം അന്തരിച്ച അബ്ദുല്‍ ഖാദര്‍ എം.എല്‍.എയുടെ മാതാവിന് എം.എല്‍.എയുടെ വീട്ടിലെത്തി അന്തിമോപചാരം അര്‍പ്പിച്ചു. വൈകീട്ടോടെ മണ്ണുത്തി പള്ളി തിരുനാളിന് പങ്കെടുക്കാനും കോണ്‍ഗ്രസ് സ്ഥാനാര്‍ഥിയെത്തി. കളത്തിലിറങ്ങാന്‍ അല്‍പം വൈകിയെങ്കിലും ഇടത് സ്ഥാനാര്‍ഥിയെ പോലെ മണ്ഡലത്തില്‍ അപരിചിതനല്ല താനെന്നാണ് പ്രതാപന്‍ പറയുന്നത്. മണ്ഡലത്തിലെ മുക്കുമൂലകളില്‍ വരെ അടുപ്പക്കാരും പരിചയക്കാരുമുണ്ട്. തീരപ്രദേശ മണ്ഡലങ്ങളില്‍ ഇടത് സ്ഥാനാര്‍ഥിയെ പോലെ അപരിചിതത്വമില്ല. ഇവിടം പ്രതാപന്റെ രാഷ്ട്രീയക്കളരിയാണ്. ജീവിതം തുഴഞ്ഞടുപ്പിച്ചതും ഇവിടെനിന്ന്.

സ്ഥാനാര്‍ഥി നിര്‍ണയം വൈകിയെങ്കിലും രണ്ടുദിവസം മുന്‍പേ നഗരത്തിലെ പ്രധാന ഇടങ്ങളിലെ ചുവരുകളിലെല്ലാം ടി.എന്‍ പ്രതാപന് വോട്ടഭ്യര്‍ഥിച്ചുള്ള എഴുത്തുകള്‍ പ്രത്യക്ഷപ്പെട്ടിരുന്നു. രാജാജി മാത്യൂവിനെ ഇറക്കി മണ്ഡലം സുരക്ഷിതമാക്കാനിറങ്ങിയ ഇടത് ക്യാംപ് കോണ്‍ഗ്രസിന്റെ സ്ഥാനാര്‍ഥി നിര്‍ണയം വൈകുന്നത് ശുഭ പ്രതീക്ഷയായാണ് കണ്ടിരുന്നത്. അര ഡസനിലധികം സ്ഥാനമോഹികള്‍ തൃശൂര്‍ സീറ്റിനായി അവകാശവാദമുന്നയിച്ചതോടെ സ്ഥാനാര്‍ഥി നിര്‍ണയം ദുഷ്‌കരവുമായിരുന്നു. സീറ്റ് കിട്ടില്ലെന്ന് ഉറപ്പായതോടെ ദേശീയ നേതാവ് പാര്‍ട്ടി വിടുന്നതിന്‌വരെ മണ്ഡലം സാക്ഷ്യം വഹിച്ചു. എന്നാല്‍, പ്രതാപന്റെ സ്ഥാനാര്‍ഥി നിര്‍ണയത്തോടെ കോണ്‍ഗ്രസ് ക്യാംപ് കൂടുതല്‍ സജീവമായിട്ടുണ്ട്. വ്യാഴാഴ്ച വൈകീട്ടോടെ പ്രതാപന്റെ സ്ഥാനാര്‍ഥിത്വം പ്രതീക്ഷിച്ച് കോണ്‍ഗ്രസിന്റെ പ്രാദേശിക നേതാക്കളും ഘടകകക്ഷി നേതാക്കളുമുള്‍പ്പെടെയുള്ളവര്‍ ഡി.സി.സി ഓഫിസിലെത്തിയിരുന്നു. അര്‍ധ രാത്രിയോടെ പ്രതാപന്റെ പേര് എ.ഐ.സി.സി പ്രഖ്യാപിച്ചതോടെ നേതാക്കള്‍ മധുരം വിതരണം ചെയ്താണ് സ്ഥാനാര്‍ഥിത്വം ആഘോഷിച്ചത്. ഏതാനും ദിവസങ്ങള്‍ക്കുള്ളില്‍ ബി.ജെ.പി സ്ഥാനാര്‍ഥിയുടെ പേര് കൂടി പ്രഖ്യാപിക്കുന്നതോടെ തൃശൂര്‍ തെരഞ്ഞെടുപ്പ് ചൂടിലമരും. ഇലഞ്ഞിത്തറ മേളവും മഠത്തില്‍വരവും കുടമാറ്റവും കൗതുക കാഴ്ചകള്‍ നിറയ്ക്കുന്ന യഥാര്‍ഥ പൂരത്തിന് മുന്‍പ് തലയെടുപ്പോടെ നില്‍ക്കാന്‍ ആരെയാണ് ഈ മണ്ഡലം കാത്തുവച്ചിരിക്കുന്നതെന്ന് കാത്തിരുന്നു കാണാം.