തിരുവനന്തപുരം: എടപ്പാളിലെ ബാലികാ പീഡനക്കേസില്‍ തിയറ്റര്‍ ഉടമയെ പ്രതിയാക്കിയ പൊലിസ് നടപടി തെറ്റെന്ന് ക്രൈംബ്രാഞ്ച് റിപ്പോര്‍ട്ട്. ദൃശ്യങ്ങള്‍ കൈമാറിയില്ലെന്നും പ്രചരിപ്പിക്കാന്‍ ശ്രമിച്ചെന്നുമുള്ള പൊലിസ് വാദം നിലനില്‍ക്കില്ലെന്നും അന്വേഷണ ഉദ്യോഗസ്ഥനായ ക്രൈംബ്രാഞ്ച് എസ്.പി സന്തോഷ് കുമാര്‍ റിപ്പോര്‍ട്ട് നല്‍കി. ദൃശ്യങ്ങള്‍ സ്വകാര്യനേട്ടത്തിന് ഉപയോഗിച്ചതായി തെളിവില്ലെന്ന് കണ്ടെത്തിയതോടെയാണ് പ്രതിയാക്കേണ്ടെന്ന് ഉറപ്പിച്ചത്. തിയറ്റര്‍ ഉടമ സതീശനെ സാക്ഷിയാക്കി കുറ്റപത്രം തയാറാക്കാന്‍ ഇന്നലെ തിരുവനന്തപുരത്ത് ചേര്‍ന്ന ക്രൈംബ്രാഞ്ച് യോഗം തീരുമാനിച്ചു.
പോക്‌സോ നിയമപ്രകാരം സതീശനെ അറസ്റ്റ് ചെയ്യുകയും ഇത് വിവാദമായതോടെ അറസ്റ്റ് പുനഃപരിശോധിക്കാന്‍ ആവശ്യപ്പെട്ട് അന്വേഷണം ക്രൈംബ്രാഞ്ചിന് കൈമാറുകയുമായിരുന്നു. പീഡനം നടന്ന ദിവസം സ്ഥലത്തില്ലാതിരുന്ന തിയറ്റര്‍ ഉടമയ്ക്ക് സംഭവത്തെക്കുറിച്ച് നേരിട്ട് അറിവില്ല. ജീവനക്കാരന്‍ പറഞ്ഞ് കാര്യം അറിഞ്ഞ ഉടമ പീഡനം മറച്ചുവയ്ക്കാന്‍ ശ്രമിച്ചില്ല.
ഒരാഴ്ചയിലേറെ കാലതാമസമുണ്ടായെങ്കിലും ചൈല്‍ഡ് ലൈന്‍ പ്രവര്‍ത്തകരടക്കം നാലുപേരെ അറിയിച്ചതുവഴി ദൃശ്യങ്ങള്‍ പൊലിസിലുമെത്തി. നേരത്തെ പൊലിസ് അറസ്റ്റ് ചെയ്‌തെങ്കിലും പ്രതിയാക്കി കോടതിയില്‍ റിപ്പോര്‍ട്ട് നല്‍കിയിരുന്നില്ല.
അതിനാല്‍ കുറ്റപത്രം നല്‍കുമ്പോള്‍ പ്രതിസ്ഥാനത്ത് നിന്ന് മാറ്റി സാക്ഷിയാക്കുന്നതില്‍ നിയമതടസങ്ങളില്ലെന്നാണ് വിലയിരുത്തല്‍. ക്രൈംബ്രാഞ്ച് ഒരുമാസത്തിനകം കുറ്റപത്രം നല്‍കും.