തിരുവനന്തപുരം: ബി.ഡി.ജെ.എസ് പ്രൈവറ്റ് ലിമിറ്റഡ് കമ്പനിയെന്ന് ബി.ഡി.ജെ.എസ് (ഡെമോക്രാറ്റിക്) നേതാക്കള്‍ വാര്‍ത്താസമ്മേളനത്തില്‍ പറഞ്ഞു.

തുഷാര്‍ വെള്ളാപ്പള്ളി മത്സരിച്ചാല്‍ തോല്‍പ്പിക്കാന്‍ എന്തുമാര്‍ഗവും സ്വീകരിക്കും. ബി.ഡി.ജെ.എസില്‍ കുടുംബവാഴ്ചയാണുള്ളത്. എസ്.എന്‍.ഡി.പി യോഗത്തിലും സ്ഥിതി വ്യത്യസ്തമല്ല. കഴിഞ്ഞ മൂന്നുവര്‍ഷമായി ബി.ഡി.ജെ.എസ് എന്ന പാര്‍ട്ടി പ്രവര്‍ത്തിക്കുന്നുണ്ടെങ്കിലും രജിസ്‌ട്രേഷന്‍ പോലുമുണ്ടോയെന്ന് സംശയമുണ്ട്. പാര്‍ട്ടിയുടെ ഭരണഘടന നേതാക്കള്‍പോലും കണ്ടിട്ടില്ല.

ബി.ഡി.ജെ.എസിനുള്ളില്‍ ജനാധിപത്യം നഷ്ടപ്പെട്ടു. അതിനാലാണ് പുതിയ പാര്‍ട്ടിക്ക് രൂപംനല്‍കിയതെന്ന് ബി.ഡി.ജെ.എസ് (ഡി) ചെയര്‍മാന്‍ ചൂഴാല്‍ ജി. നിര്‍മ്മലന്‍, ജന.കണ്‍വീനര്‍ താന്നിമൂട് സുധീന്ദ്രന്‍, കണ്‍വീനര്‍മാരായ അതുണ്‍ മയ്യനാട്, ബിജു ഹിണ്ടാസ് എന്നിവര്‍ പറഞ്ഞു. പാര്‍ട്ടിയുടെ പ്രഥമയോഗം ചേര്‍ന്ന് ഒന്‍പതംഗ സംസ്ഥാന എക്‌സിക്യുട്ടീവ് കമ്മിറ്റിക്കും രൂപംനല്‍കി.