കൊച്ചി: ഐ.പി.എല്‍ മത്സരങ്ങള്‍ക്ക് ആവേശം പകര്‍ന്ന് കൊച്ചിയില്‍ ഐ.പി.എല്‍ ഫാന്‍ പാര്‍ക്ക് വരുന്നു. 15, 16 തിയതികളില്‍ കലൂര്‍ സ്റ്റേഡിയത്തിന് സമീപമുള്ള ആല്‍ബര്‍ട്ട് കോളജ് ഗ്രൗണ്ടിലാണ് ഫാന്‍ പാര്‍ക്ക്. ഏപ്രില്‍ അഞ്ചിന് തുടങ്ങിയ ഐ.പി.എല്‍ പത്താം സീസണിന്റെ ഭാഗമായാണ് കേരളത്തില്‍ രണ്ടു ഫാന്‍ പാര്‍ക്കുകള്‍ അനുവദിച്ചത്.
ഇതാദ്യമായാണ് കേരളത്തില്‍ ഐ.പി.എല്‍ ഫാന്‍ പാര്‍ക്കുകള്‍ വരുന്നത്. 15, 16 തിയതികളില്‍ വൈകിട്ടും രാത്രിയുമായി രണ്ടു മത്സരങ്ങള്‍ വീതമാണുള്ളത്. 15ന് വൈകിട്ട് നാലിന് കൊല്‍ക്കത്ത നൈറ്റ്‌റൈഡേഴ്‌സും സണ്‍റൈസേഴ്‌സ് ഹൈദരാബാദും തമ്മിലും രാത്രി എട്ടിന് ഡല്‍ഹി ഡെയര്‍ഡെവിള്‍സും പഞ്ചാബ് കിങ്‌സ് ഇലവനും തമ്മിലാണ് മത്സരം. 16ന് ആദ്യ മത്സരത്തില്‍ മുംബൈ ഇന്ത്യന്‍സ് ഗുജറാത്ത് ലയണ്‍സിനെയും രണ്ടാം മത്സരത്തില്‍ റോയല്‍ ചലഞ്ചേഴ്‌സ് ബാംഗ്ലൂര്‍ റൈസിങ് പൂനെ സൂപ്പര്‍ജയന്റിനെയും നേരിടും.
സ്റ്റേഡിയത്തില്‍ കളി കാണുന്നതിന് സമാനമായ അന്തരീക്ഷമാണ് ഫാന്‍ പാര്‍ക്കില്‍ ഉണ്ടാവുക. എണ്ണായിരത്തോളം പേര്‍ക്ക് ഒരേ സമയം കളി കാണാനുള്ള സൗകര്യമുണ്ടാകും. വൈകിട്ട് മൂന്ന് മുതല്‍ പ്രവേശനം തുടങ്ങും. സൗജന്യമായിരിക്കും പ്രവേശനം. കൂറ്റന്‍ സ്‌ക്രീനില്‍ തത്സമയം മത്സരങ്ങള്‍ കാണിക്കുന്നതിനോടൊപ്പം വ്യത്യസ്ത പരിപാടികളും അരങ്ങേറും. ഐ.പി.എല്‍ ഔദ്യോഗിക സ്‌പോണ്‍സര്‍മാരുടെ ഭക്ഷണശാലകളും സ്റ്റാളുകളും ഇവിടെയുണ്ടാവും. 2015ലാണ് ഐ.പി.എല്‍ ഫാന്‍ പാര്‍ക്ക് തുടങ്ങിയത്. ആദ്യ വര്‍ഷം 16 നഗരങ്ങളിലായിരുന്നു പാര്‍ക്കുകള്‍. ഇത്തവണ 21 സംസ്ഥാനങ്ങളിലായി 36 നഗരങ്ങളിലാണ് ഫാന്‍ പാര്‍ക്കുകളുള്ളത്. കഴിഞ്ഞ സീസണില്‍ മൂന്നു ലക്ഷത്തോളം പേര്‍ ഫാന്‍ പാര്‍ക്കിലെത്തിയതായാണ് കണക്കുകള്‍.