മലപ്പുറം: ഇരുപത്തൊന്നാമത് 'ഇ.എം.എസിന്റെ ലോകം' ദേശീയ സെമിനാര്‍ നാളെ വണ്ടൂരില്‍ ആരംഭിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. രണ്ടു ദിവസങ്ങളായി വണ്ടൂര്‍ സിയന്ന ഓഡിറ്റോറിയത്തില്‍ നടക്കുന്ന സെമിനാര്‍ രാവിലെ 10ന് സി.പി.എം പൊളിറ്റ് ബ്യൂറോ അംഗം വൃന്ദാ കാരാട്ട് ഉദ്ഘാടനം ചെയ്യും.
കേന്ദ്ര കമ്മിറ്റിയംഗം പലോളി മുഹമ്മദ്കുട്ടി അധ്യക്ഷനാകും. സ്പീക്കര്‍ പി. ശ്രീരാമകൃഷ്ണന്‍ മുഖ്യാതിഥിയാകും. സമാപന സമ്മേളനം 30ന് വൈകിട്ട് സംസ്ഥാന സെക്രട്ടറി കോടിയേരി ബാലകൃഷ്ണന്‍ ഉദ്ഘാടനം ചെയ്യും. 'ചരിത്രം, സംസ്‌കാരം, വര്‍ഗീയത' എന്ന വിഷയത്തില്‍ സുനില്‍ പി ഇളയിടം ഇ എം.എസ് അനുസ്മരണ പ്രഭാഷ ണം നടത്തും.'മാര്‍ക്‌സ് അറ്റ് 200' സെഷന്‍ പോളിറ്റ് ബ്യൂറോ അംഗം എം.എ ബേബി ഉദ്ഘാടനം ചെയ്യും. 'ഇ.എം.എസിന്റെ മലപ്പുറം' എന്ന വിഷയത്തില്‍ ശനിയാഴ്ച സെമിനാര്‍ നടക്കും. കേന്ദ്ര കമ്മിറ്റി അംഗം എ. വിജയരാഘവന്‍ ഉദ്ഘാടനം ചെയ്യും.
സെമിനാറിന്റെ ഒരുക്കങ്ങള്‍ പൂര്‍ത്തിയായതായി ഭാരവാഹികള്‍ പറഞ്ഞു. വാര്‍ത്താസമ്മേളനത്തില്‍ ഇ.എന്‍ മോഹന്‍ദാസ്, പി.പി വാസുദേവന്‍, വി.എം ഷൗക്കത്ത്, സി. കണ്ണന്‍, അബ്ദുല്‍ റസാഖ് പങ്കെടുത്തു.