കണ്ണൂര്‍: സര്‍വകലാശാല തലശ്ശേരി കാംപസില്‍ ആരംഭിക്കുന്ന സിവില്‍ സര്‍വിസ് ട്രെയിനിങ് ഇന്‍സ്റ്റിറ്റ്യൂട്ടിന്റെ ഉദ്ഘാടനവും സ്‌കൂള്‍ ഓഫ് ലൈഫ് സയന്‍സ് ബ്ലോക്കിന്റെ ശിലാസ്ഥാപനവും നാളെ വൈകിട്ട് 3.30ന് മുഖ്യമന്തി പിണറായി വിജയന്‍ നിര്‍വഹിക്കും. ഉത്തരമലബാറിലെ വിദ്യാര്‍ഥികള്‍ക്കും തൊഴിലന്വേഷകര്‍ക്കും പ്രയോജനപ്പെടുന്ന സ്ഥാപനം സര്‍വകലാശാലയുടെ പുതിയ സംരംഭങ്ങളിലൊന്നാണ്. സെപ്റ്റംബറില്‍ ആരംഭിക്കുന്ന ആദ്യബാച്ചില്‍ 40 വിദ്യാര്‍ഥികള്‍ക്കു പ്രവേശനം ലഭിക്കും. സിവില്‍ സര്‍വിസിന്റെ പ്രിലിമിനറി, മെയിന്‍ പരീക്ഷകള്‍ അടിസ്ഥാനമാക്കിയുള്ള പരിശീലനമാണു സ്ഥാപനം നല്‍കുക. എല്ലാവിധ ആധുനിക പഠനോപകരണങ്ങളും ശീതീകരിച്ച ക്ലാസ് മുറിയും റഫറന്‍സ് ലൈബ്രറിയും സര്‍വകലാശാല ക്രമീകരിച്ചിട്ടുണ്ടെന്നു വൈസ് ചാന്‍സലര്‍ ഗോപിനാഥ് രവീന്ദ്രന്‍ വാര്‍ത്താസമ്മേളനത്തില്‍ പറഞ്ഞു. ഓപ്പണ്‍ എയര്‍ ഓഡിറ്റോറിയത്തിന്റെ ശിലാസ്ഥാപനം മന്ത്രി സി. രവീന്ദ്രനാഥ് നിര്‍വഹിക്കും. പി.കെ ശ്രീമതി എം.പി മുഖ്യാതിഥിയാകും. പി.ടി രവീന്ദ്രന്‍, ബാലചന്ദ്രന്‍ കീഴോത്ത്, ബാബു ആന്റോ, ഷാജി ജോസ് എന്നിവരും കാര്യങ്ങള്‍ വിശദീകരിച്ചു.