പാരിസ്: ചില കളിക്കാരെ ലോകമറിയുന്നത് പ്രത്യേക ഗോളുകളിലൂടെയായിരിക്കും. ഗോളടിക്കുന്നത് ച്യാംപ്യന്‍മാരെ നിര്‍ണയിക്കുന്ന കലാശക്കൊട്ടിലാണെങ്കില്‍ പിന്നെ ആയാള്‍ രാജ്യം ഓര്‍ക്കുന്ന എക്കാലത്തെയും മികച്ച ഫുട്‌ബോളറുമാവും. യുറോ കലാശക്കളിയില്‍ ഫുട്‌ബോള്‍ ലോകം മറക്കാത്ത മുഖം ഇനി പോര്‍ച്ചുഗല്‍ താരം എഡറിന്റെതാണ്. അധികമാരും അറിയാത്ത പോര്‍ച്ചുഗല്‍ ഫുട്‌ബോള്‍ ടീമിലെ താരം ഇനി മാന്ത്രിക കാലിന്റെ ഉടമയാണ്. മുഴുവന്‍ പേര് എഡര്‍ അന്റോണിയോ മസിഡോ ലോപസ്. നിലവില്‍ ഫ്രഞ്ച് ഫുട്‌ബോള്‍ ക്ലബ് ലില്ലേയുടെ താരമാണ്. മുന്‍ നിര ക്ലബുകളിലെത്തിയില്ലെങ്കിലും വിവിധ ക്ലബുകള്‍ക്കായി ഇതുവരെ 72ഓളം ഗോള്‍ നേടിയിട്ടുണ്ട്. പോര്‍ചുഗലിനുവേണ്ടി 29 കളിയില്‍ നാലു ഗോളാണ് ഈ ഇരുപത്തിയെട്ടുകാരന്റെ സമ്പാദ്യം.