കൊട്ടാരക്കര(കൊല്ലം): തമിഴ്‌നാട്ടിലെ നാമക്കലില്‍ കാറപകടത്തില്‍ കൊട്ടാരക്കര സ്വദേശികളായ രണ്ട് യുവാക്കള്‍ മരിച്ചു. കോയമ്പത്തൂര്‍- സേലം റൂട്ടിലെ നാമക്കലില്‍ ഇന്നലെ രാവിലെ ഏഴോടെയായിരുന്നു അപകടം. നെല്ലിക്കുന്നം പുളിവേലില്‍വീട്ടില്‍ ജിനു വര്‍ഗീസ് (27), കിഴക്കേത്തെരുവ് വടവോട് തെങ്ങുംവിള വീട്ടില്‍ ജിജോ തോമസ് (30) എന്നിവരാണ് മരിച്ചത്. ജിജോ തോമസ് ബംഗളൂരുവിലെ  ഐ.ടി കമ്പനിയില്‍ മാനേജരായിരുന്നു. ബംഗളൂരുവില്‍ എം.ബി.എ വിദ്യാര്‍ഥിയാണ് ജിനു. ലോക്ക്ഡൗണിനെ  തുടര്‍ന്ന്  ബംഗളൂരുവില്‍ കുടുങ്ങിയ ഇരുവരും തിരികെ വീട്ടിലേക്ക് മടങ്ങുംവഴിയായിരുന്നു അപകടം. 

യാത്രാപാസ് എടുത്തു പുളിയറ ചെക്‌പോസ്റ്റ് വഴി വരാനായിരുന്നു തീരുമാനം. ഇന്നലെ പുലര്‍ച്ചയോടെ യാത്ര തിരിച്ച്  നാമക്കല്ലില്‍ എത്തിയപ്പോള്‍ കാര്‍  മീഡിയനില്‍ ഇടിച്ച് മറിയുകയായിരുന്നു. അപകടത്തില്‍  ഇരുവരും കാറിനുള്ളില്‍ കുടുങ്ങിപ്പോയി. പിറകെയെത്തിയ വാഹനത്തില്‍ ഉണ്ടായിരുന്നവര്‍ പൊലിസിനെ വിവരം അറിയിക്കുകയായിരുന്നു. പൊലിസും  അഗ്‌നിരക്ഷാസേനയും ചേര്‍ന്ന് ഇരുവരെയും പുറത്തെടുത്തു സമീപത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഇന്ന് പുലര്‍ച്ചയോടെ മൃതദേഹങ്ങള്‍ വീട്ടിലെത്തിക്കും.