തിരുവനന്തപുരം: കഴിഞ്ഞ ദിവസം വിരമിച്ച ചീഫ് സെക്രട്ടറി ടോം ജോസിന് പുതിയ ചുമതല. മുഖ്യമന്ത്രിയുടെ ഓഫിസ് കേന്ദ്രീകരിച്ച് കൊവിഡ് പ്രതിരോധപ്രവര്‍ത്തനങ്ങള്‍ ഏകോപിപ്പിക്കുകയാണ് ടോം ജോസിന് ലഭിച്ചിരിക്കുന്ന പുതിയ ചുമതല. മുഖ്യമന്ത്രി പിണറായി വിജയന്റെ ഏറ്റവും വിശ്വസ്തനായ ടോം ജോസിനെ ചീഫ് സെക്രട്ടറി തസ്തികയ്ക്ക് സമാനമായ പദവിയില്‍ തന്നെയാണ് നിയമിച്ചിരിക്കുന്നത്. കൊവിഡ് പ്രതിരോധപ്രവര്‍ത്തനങ്ങള്‍ ഏകോപിപ്പിക്കുന്നതിനായി നൂറോളം ഉദ്യോഗസ്ഥര്‍ ചേര്‍ന്ന് സെക്രട്ടേറിയറ്റില്‍ വാര്‍ റൂം എന്ന പേരില്‍ മുഴുവന്‍ സമയവും പ്രവര്‍ത്തിക്കുന്നുണ്ട്. ഇത്രയും ഉദ്യോഗസ്ഥര്‍ പ്രവര്‍ത്തിക്കുമ്പോഴും പുതുതായി ചീഫ് സെക്രട്ടറി വരുന്നതിനും ഇടയിലാണ് ടോം ജോസിനെ മുഖ്യമന്ത്രി ഒരു പദവിയില്‍ എത്തിച്ചിരിക്കുന്നത്