തൊടുപുഴ: തേക്കടി വനമേഖയില്‍ തേന്‍ ശേഖരിക്കാന്‍ പോയ ആദിവാസിക്ക് കരടിയുടെ ആക്രമണത്തില്‍ ഗുരുതര പരുക്ക്. കുമളി പളിയക്കുടി ആദിവാസി സെറ്റില്‍മെന്റില്‍ താമസിക്കുന്ന അര്‍ജുന(58)നാണ് കരടിയുടെ ആക്രമണത്തില്‍ പരുക്കേറ്റത്. ഇന്നലെ പകല്‍ 12ഓടെയാണ് നെല്ലിക്കാംപെട്ടിയിലെ ആന ചത്ത ഓളി എന്ന സ്ഥലത്ത് വച്ച് ആക്രമണമുണ്ടായത്.
രാവിലെ തേനെടുക്കാനാണ് അര്‍ജുനനും സംഘവും വനത്തിനുള്ളിലേക്ക് പോയത്. തേന്‍ ശേഖരിച്ച് മടങ്ങുമ്പോഴായിരുന്നു ആക്രമണം. സംഭവം നടന്നയുടന്‍ കൂടെയുണ്ടായിരുന്നവര്‍ തേക്കടിയില്‍ വിവരം അറിയിച്ചു. തുടര്‍ന്ന് സ്പീഡ് ബോട്ടിലാണ് പരുക്കേറ്റ അര്‍ജുനനെ ബോട്ട് ലാന്‍ഡിങില്‍ എത്തിച്ചത്. പ്രഥമശുശ്രുഷ നല്‍കിയശേഷം കട്ടപ്പന സെന്റ് ജോണ്‍സ് ആശുപത്രിയില്‍ എത്തിക്കുകയായിരുന്നു. അര്‍ജുനന്റെ തലയ്ക്കും കൈയ്ക്കും പുറത്തുമാണ് കരടിയുടെ ആക്രമണമേറ്റത്.