കണ്ണൂര്‍: ബി.ജെ.പിയിലേക്കു ചേക്കേറുന്ന നേതാക്കളുടെ പാര്‍ട്ടിയായി കോണ്‍ഗ്രസ് മാറിയെന്നും കോണ്‍ഗ്രസ് നാണംകെട്ട പാര്‍ട്ടിയായി മാറിയെന്നും മുഖ്യമന്ത്രി പിണറായി വിജയന്‍. എ.കെ.ജി ദിനാചരണത്തിന്റെ ഭാഗമായി എ.കെ.ജി പ്രതിമയില്‍ പുഷ്പാര്‍ച്ചന നടത്തിയശേഷം അനുസ്മരണ പ്രഭാഷണം നടത്തുകയായിരുന്നു അദ്ദേഹം.
ഇന്നത്തെ ബി.ജെ.പി നേതാക്കളില്‍ നല്ലൊരു ഭാഗം പഴയ കോണ്‍ഗ്രസ് നേതാക്കളാണ്. മുന്‍ എ.ഐ.സി.സി നേതാക്കള്‍, മുന്‍ കേന്ദ്രമന്ത്രിമാര്‍, മുഖ്യമന്ത്രിമാര്‍, പാര്‍ട്ടി സംസ്ഥാന അധ്യക്ഷര്‍, ചില പ്രദേശങ്ങളില്‍ പാര്‍ട്ടിയുടെ മുഖമായി പ്രവര്‍ത്തിച്ച കോണ്‍ഗ്രസ് നേതാക്കള്‍ എന്നിവരെയെല്ലാം ഇന്നു ബി.ജെ.പിയിലാണു കാണാന്‍ കഴിയുന്നത്. ഗോവയില്‍ കൂടുതല്‍ നേതാക്കള്‍ ബി.ജെ.പിയില്‍ ചേര്‍ന്നു. ത്രിപുരയില്‍ മരുന്നിനു കൂട്ടാന്‍പോലും ബി.ജെ.പിക്കാരില്ലായിരുന്നു. അവിടെ കോണ്‍ഗ്രസിന്റെ സംസ്ഥാന പ്രസിഡന്റും പ്രതിപക്ഷ നേതാവും ഉള്‍പ്പെടെ ഒരു പാര്‍ട്ടിയാകെ ബി.ജെ.പിയില്‍ പോകുന്ന കാഴ്ചയാണു നമ്മള്‍ കണ്ടതെന്നും പിണറായി വ്യക്തമാക്കി.