ന്യൂഡല്‍ഹി: ഗുരുഗ്രാമിലെ ധമാസ്പൂരില്‍ മുസ് ലിം കുടുംബത്തെ ഒരു സംഘം വീട്ടില്‍ കയറി ആക്രമിച്ചു. ഹോളി ദിവസമായ വ്യാഴാഴ്ച്ച വൈകീട്ടാണ് നാല്‍പതംഗ സംഘം ഹോക്കി സ്റ്റിക്കുകളും ഇരുമ്പു ദണ്ഡുകളുമായി വീട്ടിലെത്തി ആക്രമണം നടത്തിയത്. സംഭവവുമായി ബന്ധപ്പെട്ട് ആറു പേരെ പൊലിസ് അറസ്റ്റ് ചെയ്തിട്ടുണ്ട്.

ഉത്തര്‍പ്രദേശ് സ്വദേശിയായ മൂന്നു വര്‍ഷമായി കുടുംബസമേതം ഗുരുഗ്രാമില്‍ താമസിക്കുന്ന മുഹമ്മദ് സാജിദിന്റെ കുടുംബമാണ് ആക്രമിക്കപ്പെട്ടത്.

വീടിനു സമീപത്തെ ഒഴിഞ്ഞ സ്ഥലത്ത് കുട്ടികള്‍ ക്രിക്കറ്റ് കളിക്കുകയായിരുന്നു. മദ്യപിച്ച് ബൈക്കിലെത്തിയ രണ്ടുപേര്‍ നിങ്ങളിവിടെ എന്ത് ചെയ്യുകയാണ് പോയി പാകിസ്താനില്‍ ചെന്ന് കളിക്കൂ എന്ന് പറഞ്ഞിരുന്നു. ഇത് പിന്നീട് വാക്കുതര്‍ക്കത്തിലേക്ക് നയിക്കുകയും ശേഷം തിരികെ പോയ സംഘം ആളുകളെകൂട്ടിവന്ന് ആക്രമണം നടത്തുകയായിരുന്നു.

കുടുംബത്തിലെ സ്ത്രീകള്‍ക്കു നേരെയും ആക്രമണമുണ്ടായി. മര്‍ദ്ദിക്കരുതെന്ന് നിരവധി തവണ ആവശ്യപ്പെട്ടെങ്കിലും ചെവികൊള്ളാന്‍ സംഘം തയ്യാറായില്ല. സജാദിന്റെ ബോധം മറഞ്ഞ ശേഷമാണ് മര്‍ദ്ദനം നിര്‍ത്തിയത്. ഇതുമായി ബന്ധപ്പെട്ട് പൊലിസില്‍ പരാതി നല്‍കിയപ്പോള്‍ നടപടിയെടുക്കാന്‍ ആദ്യം തയ്യാറായില്ലെന്നും ആരോപണമുണ്ട്.