കോട്ടയം: പല തവണ പീഡിപ്പിച്ചതായി കന്യാസ്ത്രീയുടെ പരാതിയെ തുടര്‍ന്ന് കത്തോലിക്കാ ബിഷപ്പിനെതിരേ പൊലിസ് കേസെടുത്ത് അന്വേഷണം ആരംഭിച്ചു. കത്തോലിക്ക സഭയുടെ ജലന്ധര്‍ അതിരൂപത ബിഷപ്പും മലയാളിയുമായ ഫ്രാങ്കോ മുളയ്ക്കലിനെതിരേയാണ് കേസെടുത്തത്്. 

അതേസമയം, ബിഷപ്പും കന്യാസ്ത്രീയ്‌ക്കെതിരേ പൊലിസില്‍ പരാതി നല്‍കി. കന്യാസ്ത്രീയെ സ്ഥലം മാറ്റിയതിലുളള വിരോധമാണ് പരാതിക്ക് പിന്നിലെന്നും തന്നെ വധിക്കാന്‍ ശ്രമിക്കുന്നു എന്നുമാണ് കന്യാസ്ത്രീക്കെതിരേ ബിഷപ്പു നല്‍കിയ പരാതി.
കോട്ടയം ജില്ലാ പൊലിസ് മേധാവിക്കാണ് കന്യാസ്ത്രീ പരാതി നല്‍കിയത്. കന്യാസ്ത്രീയില്‍നിന്ന് മൊഴി എടുത്തു. നിയമനടപടികളുമായി മുന്നോട്ട് പോകുമെന്നും അതിനാല്‍ ഇപ്പോള്‍ പരസ്യമായ പ്രതികരണത്തിനില്ലെന്നും കാര്യങ്ങള്‍ എല്ലാം അറിയിക്കേണ്ടവരെ അറിയിച്ചിട്ടുണ്ടെന്നും കന്യാസ്ത്രീ മാധ്യമങ്ങളോട് പറഞ്ഞു.