വടകര: കോണ്‍ഗ്രസിന്റെ വടകരയിലെ സ്ഥാനാര്‍ഥിത്വത്തില്‍ അനിശ്ചിതത്വമില്ലെന്ന് യു.ഡി.എഫ് സ്ഥാനാര്‍ഥി കെ. മുരളീധരന്‍. കേന്ദ്ര നേതൃത്വം അറിയിച്ചതിനനുസരിച്ചാണ് പ്രചാരണം തുടങ്ങിയതെന്നും അദ്ദേഹം പറഞ്ഞു. കോണ്‍ഗ്രസ് പുറത്തിറക്കിയ എട്ടാംസ്ഥാനാര്‍ഥി പട്ടികയിലും പേരില്ലാത്തതിനെ തുടര്‍ന്നാണ് മുരളീധരന്റെ പ്രതികരണം.

വടകരയിലെയും വയനാട്ടിലെയും സ്ഥാനാര്‍ഥികളുടെ പേര് കോണ്‍ഗ്രസ് നേതൃത്വം ഇതുവരെ ഔദ്യോഗികമായി പ്രഖ്യാപിച്ചിട്ടില്ല. തന്നെ സ്ഥാനാര്‍ഥിയാക്കിക്കൊണ്ട് കോണ്‍ഗ്രസ് നേതൃത്വം കത്ത് നല്‍കിയെന്ന് നേരത്തെ മുരളീധരന്‍ വ്യക്തമാക്കിയിരുന്നു. അതിനിടെയാണ് പ്രചാരണം ആരംഭിച്ച ടി. സിദ്ദീഖിന് പകരം വയനാട്ടില്‍ കോണ്‍ഗ്രസ് അധ്യക്ഷന്‍ രാഹുലിന്റെ പേര് ഉയര്‍ന്നുവന്നത്.