ചെങ്ങന്നൂര്‍: മൂന്നാം ക്ലാസ് വിദ്യാര്‍ഥിയെ ക്രൂരമായി മര്‍ദിച്ച് പരുക്കേല്‍പ്പിക്കുകയും സമൂഹ അകലം പാലിക്കാതെ പഠിപ്പിക്കുകയും ചെയ്ത ട്യൂഷന്‍ അധ്യാപകനെതിരേ കേസെടുത്തു. മുളക്കുഴ പിരളശേരി മുരളിയില്‍ വീട്ടില്‍ മുരളീധരനെതിരേയാണ് ചെങ്ങന്നൂര്‍ പൊലിസ് കേസെടുത്തത്.

കഴിഞ്ഞ 30ന് വൈകിട്ട് അഞ്ചോടെ വീട്ടില്‍ വച്ച് അഞ്ച് കുട്ടികള്‍ക്ക് ട്യൂഷനെടുക്കുകയും ഒരാളെ ചൂരല്‍കൊണ്ട് കൈയ്ക്കും കാലിനും വയറിലും അടിച്ചു പരുക്കേല്‍പ്പിക്കുകയുമായിരുന്നു. കുട്ടിയുടെ ശരീരമാകെ അടിയേറ്റ പാടുകളുണ്ട്. 

കുട്ടിക്ക് മര്‍ദനമേറ്റ വിവരം വീട്ടുകാര്‍ ചൈല്‍ഡ്‌ലൈന്‍ പ്രവര്‍ത്തകരെയോ പൊലിസിനെയോ അറിയിച്ചിരുന്നില്ല. പിന്നീട് വിവരമറിഞ്ഞ ആശാ പ്രവര്‍ത്തകരും വാര്‍ഡ് അംഗവും ഇടപെട്ടാണ് ചൈല്‍ഡ്‌ലൈനിലും പൊലിസിലും പരാതി നല്‍കിയത്. ജുവനൈല്‍ ജസ്റ്റിസ് നിയമപ്രകാരവും ലോക്ക്ഡൗണ്‍ ലംഘനവും ഉള്‍പ്പെടുത്തിയാണ് കേസ്.