സ്വന്തം ലേഖകന്‍

കൊച്ചി: 'ചെലവിനുപോലും ഞങ്ങടെ കൈയില്‍ പൈസയില്ല...ഞങ്ങക്കാര്‍ക്കും ഇപ്പോ രോഗമില്ല...ഇവിടെ നിര്‍ത്തി ഞങ്ങളെ രോഗികളാക്കി വീട്ടുകാരില്‍ നിന്നകറ്റരുതേ...ഞങ്ങളെ കുടുംബത്തോടൊപ്പം എത്തിച്ചാല്‍ ഞങ്ങള്‍ നിങ്ങളോട് എന്നും കടപ്പെട്ടവരായിരിക്കും...'ദുബൈയിലെ അല്‍ഖൂസിലെ എം.ആര്‍ ക്യാംപില്‍ മൂന്നുമാസമായി ശമ്പളവും ഭക്ഷണവുമില്ലാതെ കഴിയുന്ന പ്രവാസി മലയാളികളുടെ വികാര നിര്‍ഭരമായ യാചനാ വിഡിയോ വൈറലാവുകയാണ്.

വിഡിയോയില്‍ ദൃശ്യമാകുന്നതിനേക്കാള്‍ ഏറെപ്പേര്‍ റൂമുകളിലുണ്ടെന്നും ഇവിടെ കുടുങ്ങി കിടക്കുകയാണെന്നും എങ്ങനെയെങ്കിലും രക്ഷിക്കണമെന്നുമാണ് അഭ്യര്‍ഥന.

പൈസ തങ്ങളെങ്ങനെയെങ്കിലും നല്‍കാമെന്നും മെഡിക്കല്‍ കാര്‍ഡ് കഴിഞ്ഞതാണെന്നും കൂടുതല്‍ ആളുകളും സുഖമില്ലാത്തവരാണെന്നും പറയുന്നുണ്ട്.ഫ്‌ളൈറ്റ് ഉണ്ടെങ്കില്‍ സഹായിക്കാമെന്ന് കമ്പനി പറയുന്നുണ്ടെന്നും മറ്റ് സഹായത്തിനൊന്നും നിര്‍വാഹമില്ലെന്ന് കമ്പനി അറിയിച്ചതായും വിഡിയോയില്‍ ഒരു യുവാവ് വിശദീകരിക്കുന്നു.

ഈ അഭ്യര്‍ഥന രാഷ്ട്രീയഭേദമില്ലാതെ കണ്ട് സഹായിക്കാന്‍ എല്ലാവരോടുമായാണ് വിഡിയോയിലെ യുവാവിന്റെ അഭ്യര്‍ഥന. മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് രമേശ് ചെന്നിത്തല, വിദേശകാര്യമന്ത്രി വി. മുരളീധരന്‍ തുടങ്ങിയവരുടെ പേരെടുത്ത് പറഞ്ഞാണ് രക്ഷിക്കാന്‍ അഭ്യര്‍ഥിക്കുന്നത്.'ഹെല്‍പ്പ് ചെയ്യാന്‍ പറ്റുന്ന ആരെങ്കിലുമുണ്ടെങ്കില്‍' തങ്ങളെ രക്ഷിക്കണമെന്നും അഭ്യര്‍ഥനയിലുണ്ട്.