തളിപ്പറമ്പ് : സി.പി.ഐ നേതാവും യുവ കലാസാഹിതി ജനറല്‍ സെക്രട്ടറിയുമായിരുന്ന എന്‍.സി മമ്മൂട്ടി മാസ്റ്ററുടെ ഒന്‍പതാം ചരമവാര്‍ഷികവും അവാര്‍ഡ് സമര്‍പ്പണവും 18ന് നടക്കുമെന്ന് എന്‍.സി.മമ്മൂട്ടി സ്മാരക സമിതി പ്രവര്‍ത്തകര്‍ പത്രസമ്മേളനത്തില്‍ അറിയിച്ചു. തളിപ്പറമ്പ് ടൗണ്‍ സ്‌ക്വയറില്‍ 18ന് വൈകുന്നേരം നാലിന് നടക്കുന്ന അനുസ്മരണ സമ്മേളനത്തിന്റെ ഉദ്ഘാടനവും അവാര്‍ഡ് സമര്‍പ്പണവും ഡോ.ഖദീജ മുംതാസ് നിര്‍വഹിക്കും.
കവിയും നോവലിസ്റ്റുമായ മുണ്ട്യാടി ദാമോദരനാണ് ഇത്തവണത്തെ എന്‍.സി മമ്മൂട്ടി സ്മാരക അവാര്‍ഡിന് അര്‍ഹനായത്. ആദരപത്രവും, 15000 രൂപയും അടങ്ങുന്നതാണ് അവാര്‍ഡ്. പി.കെ.ഗോപി അനുസ്മരണ പ്രഭാഷണം നടത്തും. പന്ന്യന്‍ രവീന്ദ്രന്‍, എ.പി.കുഞ്ഞാമു, ഇ.എം സതീശന്‍, വി. ആയിഷ ബീവി  സംസാരിക്കും. വാര്‍ത്താ സമ്മേളനത്തില്‍ എ.ആര്‍.സി.നായര്‍, പി.അജയകുമാര്‍ പങ്കെടുത്തു.