കക്കട്ടില്‍: കഴിഞ്ഞ രണ്ടാഴ്ചയ്ക്കിടയില്‍ പതിനഞ്ചോളം ആടുകളെ അഞ്ജാത ജീവി കൊന്നു തിന്നതോടെ ആശങ്കയിലായിരിക്കുകയാണ് ആട് കര്‍ഷകര്‍. കഴിഞ്ഞ ദിവസം അരൂര്‍ നടക്കുമീത്തല്‍ കിഴക്കയില്‍ മറിയത്തിന്റെ നാല് ആടുകളെയും, എടത്തറോത്ത് അമ്മതിന്റെ മൂന്നു ആടുകളെയുമാണ് കൊന്നത്.
അരൂര്‍ നടക്കുമീത്തല്‍ വില്ലങ്കണ്ടി ജമാലിന്റെ വീട്ടിലെ നാലു ആടുകളെ കഴിഞ്ഞ ആഴ്ച കൊന്നു തിന്നിരുന്നു. സമീപത്തു തന്നെയുള്ള മറ്റൊരു വീട്ടിലും സമാന സംഭവമുണ്ടായിരുന്നു. എന്നാല്‍ അഞ്ജാത ജീവിയെ കണ്ടെത്താനാവാത്തതാണ് നാട്ടുകാരുടെ നെഞ്ചിടിപ്പുകൂട്ടിയിരിക്കുന്നത്. ആടുകളെ പോറ്റല്‍ ഉപജീവനമാക്കിയവര്‍ക്ക് താങ്ങാനാവാത്തതാണ് ഈ സംഭവം. കര്‍ഷകര്‍ക്ക് നഷ്ടപരിഹാരം ലഭ്യമാക്കണമെന്ന ആവശ്യം അധികൃതര്‍ കണ്ടില്ലന്നു നടിക്കുകയാണെന്ന ആക്ഷേപവുമുണ്ട്. അജ്ഞാത ജീവിയെ കെണിയില്‍ വീഴ്ത്താനാവശ്യമായ സജ്ജീകരണങ്ങള്‍ ഒരുക്കണമെന്ന ആവശ്യവും ഉയര്‍ന്നിട്ടുണ്ട്.