ഭോപ്പാല്‍: മധ്യപ്രദേശില്‍ നിലവിലെ ബി.ജെ.പി സര്‍ക്കാരിന് ഭീഷണിയായി ബി.ജെ.പി നേതാവും മുന്‍ മന്ത്രിയുമായിരുന്ന ബാലേന്ദു ശുക്ല കോണ്‍ഗ്രസില്‍ ചേര്‍ന്നു. 

സംസ്ഥാനത്ത് കോണ്‍ഗ്രസ് വിമത എം.എല്‍.എമാര്‍ രാജിവച്ച സീറ്റുകളിലേക്ക് ഉപതെരഞ്ഞെടുപ്പ് നടക്കാനിരിക്കേയാണ് ബി.ജെ.പി നേതാവ് കോണ്‍ഗ്രസില്‍ ചേര്‍ന്നത്. ഇദ്ദേഹത്തിന് മുന്‍ മുഖ്യമന്ത്രിയും കോണ്‍ഗ്രസ് നേതാവുമായ കമല്‍നാഥിന്റെ നേതൃത്വത്തില്‍ പാര്‍ട്ടിയില്‍ അംഗത്വം നല്‍കുകയും ചെയ്തു.

നേരത്തെ കോണ്‍ഗ്രസ് നേതാവായിരുന്ന ശുക്ല 2009ല്‍ ജ്യോതിരാദിത്യ സിന്ധ്യയുമായുണ്ടായ അഭിപ്രായവ്യത്യാസത്തെ തുടര്‍ന്ന് ബി.ജെ.പിയില്‍ ചേര്‍ന്നതായിരുന്നു. സിന്ധ്യയെ ബി.ജെ.പി സ്വീകരിച്ചതില്‍ ഇദ്ദേഹം എതിര്‍പ്പിലായിരുന്നെന്നാണ് വിവരം. ഇദ്ദേഹത്തിന്റെ പാര്‍ട്ടിയിലേക്കുള്ള തിരിച്ചുവരവിനെ കമല്‍നാഥ് സ്വാഗതം ചെയ്തു. സംസ്ഥാനത്ത് 24 സീറ്റുകളിലേക്കാണ് ഉപതെരഞ്ഞെടുപ്പ് നടക്കാനിരിക്കുന്നത്. ഇതില്‍ 22ഉം കോണ്‍ഗ്രസ് വിമത എം.എല്‍.എമാര്‍ രാജിവച്ച സീറ്റുകളാണ്. 

ജ്യോതിരാദിത്യ സിന്ധ്യയ്‌ക്കൊപ്പം അവര്‍ രാജിവച്ചതിനെ തുടര്‍ന്നായിരുന്നു മധ്യപ്രദേശില്‍ കമല്‍നാഥിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാരിന് അധികാരം നഷ്ടപ്പെട്ടിരുന്നത്. തുടര്‍ന്ന് ശിവരാജ് സിങ് ചൗഹാന്റെ നേതൃത്വത്തില്‍ ബി.ജെ.പി അധികാരത്തിലെത്തിയെങ്കിലും ലോക്ക്ഡൗണ്‍ കാരണം മന്ത്രിസഭാ രൂപീകരണം പൂര്‍ത്തിയായിട്ടില്ല. സംസ്ഥാനത്ത് ഉപതെരഞ്ഞെടുപ്പുകള്‍ നടക്കുന്ന തിയതി പ്രഖ്യാപിച്ചിട്ടില്ല.