മങ്കട: മലപ്പുറം മങ്കടയില്‍ 6.75 ലക്ഷം രൂപയുടെ ഹാന്‍സ് പിടികൂടി. കഴിഞ്ഞ ദിവസം പുലര്‍ച്ചെ മൂന്നിനു തിരൂര്‍ക്കാട്ട് വെട്ടിക്കുന്നന്‍ അശ്‌റഫിന്റെ വീട്ടില്‍നിന്നാണ് 18 ചാക്കുകളില്‍ സൂക്ഷിച്ചിരുന്ന 27,000 പാക്കറ്റ് ലഹരിമരുന്ന് പിടികൂടിയത്. പൊലിസിനു ലഭിച്ച രഹസ്യ വിവരത്തെ തുടര്‍ന്നു നടത്തിയ പരിശോധനയിലാണ് പ്രതി പിടിയിലായത്. പുലര്‍ച്ചെ വാഹനത്തിലെത്തിച്ച ഹാന്‍സ് വീട്ടിലെ ഔട്ട്ഹൗസില്‍ ഇറക്കുന്നതിനിടെ പിടികൂടുകയായിരുന്നു.

തമിഴ്‌നാട് പൊള്ളാച്ചിയിലെ ശരവണന്‍ വഴിയാണ് ഹാന്‍സ് ലഭിച്ചതെന്നും മലപ്പുറം ജില്ലയിലെ വിവിധ സ്ഥലങ്ങളില്‍ വില്‍പനയ്ക്കു കൊണ്ടുവന്നതാണ് ഹാന്‍സെന്നും പ്രതി സമ്മതിച്ചു.
അന്യസംസ്ഥാനങ്ങളില്‍നിന്നു ചെറിയ വിലയ്ക്കു വാങ്ങുന്ന ഹാന്‍സ് കേരളത്തിലെത്തിയാല്‍ ഒരു പായ്ക്കറ്റിന് 25 രൂപയ്ക്കാണ് വില്‍ക്കുന്നത്. ലഹരിവസ്തുക്കള്‍ മലപ്പുറം ജില്ലയിലെ വിവിധ സ്‌കൂള്‍ പരിസരങ്ങള്‍ കേന്ദ്രീകരിച്ചു സുലഭമായി ലഭിച്ചുവരുന്നതായാണ് വിവരം. അന്യസംസ്ഥാന തൊഴിലാളികള്‍ വഴിയും ഹാന്‍സ് കേരളത്തിലെത്തുന്നുണ്ട്. മങ്കട എസ്.ഐ എ.എച്ച് സഫീറിന്റെ നേതൃത്വത്തിലുള്ള പൊലിസ് സംഘമാണ് ഹാന്‍സ് പിടികൂടിയത്.