പടിഞ്ഞാറങ്ങാടി: ആനക്കര മഖാം ഉറൂസ് ഏപ്രില്‍ 21, 22, 23 തിയ്യതികളില്‍ ആനക്കരയില്‍  നടക്കും. സമസ്ത കേരള ജംഇയ്യത്തുല്‍ ഉലമാ പ്രസിഡന്റായിരുന്ന മര്‍ഹൂം ആനക്കര കോയക്കുട്ടി മുസ്‌ലിയാര്‍ മരണപ്പെട്ട് ഒരാണ്ട് തികയുന്ന ഏപ്രില്‍ 21, 22, 23 തിയ്യതികളില്‍ ആനക്കര മഖാം പരിസരത്ത് അനുസ്മരണ സമ്മേളനം നടക്കും.
ഇരുപത്തിയൊന്ന് വെള്ളി വൈകുന്നേരം നാല് മണിക്ക് മഖാം സിയാറത്ത്, ഖത്മുല്‍ ഖുര്‍ആന്‍ ദുആ മജ്‌ലിസ് എന്നിവക്ക് അത്തിപ്പറ്റ ഉസ്താദ് നേതൃത്വം നല്‍കും. വൈകിട്ട് ഏഴിന് നടക്കുന്ന ഉദ്ഘാടന സമ്മേളനം സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്യും. വി.ടി ബല്‍റാം എം.എല്‍.എ, സിംസാറുല്‍ ഹഖ് ഹുദവി, സ്വലാഹുദ്ധീന്‍ ഫൈസി വല്ലപ്പുഴ പ്രസംഗിക്കും.
ഇരുപത്തിരണ്ടാം തിയ്യതി ശനി രാവിലെ ഒന്‍പത് മണിക്ക് പണ്ഡിത ദര്‍സിന് സി.കെ.എം സ്വാദിഖ് മുസ്‌ലിയര്‍ അധ്യക്ഷനാകും. സമസ്ത കേരള ജംഇയ്യത്തുല്‍ ഉലമാ പ്രസിഡന്റ് ജിഫ്രി മുത്തുക്കോയ തങ്ങള്‍ നേതൃത്വം നല്‍കും. വൈകുന്നേരം ഏഴിന് നടക്കുന്ന ആത്മീയ സംഗമത്തില്‍ സമസ്ത കേരള വിദ്യഭ്യാസ ബോര്‍ഡ് സെക്രട്ടറി എം.ടി അബ്ദുല്ല മുസ്‌ലിയാരുടെ അധ്യക്ഷതയില്‍ സയ്യിദ് സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. മന്ത്രി കെ.ടി ജലീല്‍ വിശിഷ്ട അതിഥിയാകും. ഹമീദ് ഫൈസി അമ്പലക്കടവ്, ജലീല്‍ റഹ്മാനി വാണിയന്നൂര്‍ പ്രസംഗിക്കും.
ഇരുപത്തിമൂന്ന് ഞായര്‍ രാവിലെ പത്തിന്ന് യൂത്ത് മീറ്റ് നടക്കും. വൈകുന്നേരം ഏഴിന് നടക്കുന്ന സമാപന സമ്മേളനം സമസ്ത കേരള ജംഇയ്യത്തുല്‍ ഉലമ ജന.സെക്രട്ടറി ആലിക്കുട്ടി മുസ്‌ലിയാരുടെ അധ്യക്ഷതയില്‍ പാണക്കാട് സയ്യിദ് ഹൈദറലി ശിഹാബ് തങ്ങള്‍ ഉദ്ഘാടനം ചെയ്യും. ഇ.ടി മുഹമ്മദ് ബഷീര്‍, ഹമീദലി ശിഹാബ് തങ്ങള്‍, അബ്ദുസ്സമദ് പൂക്കോട്ടൂര്‍ സംബന്ധിക്കും.