തേഞ്ഞിപ്പലം: പറമ്പില്‍പീടിക ഉദയ ക്ലബ്ബിന് കീഴില്‍ പെരുവള്ളൂര്‍ പഞ്ചായത്തില്‍ ജലക്ഷാമം നേരിടുന്ന പ്രദേശങ്ങളില്‍ കുടിവെള്ളമെത്തിക്കുന്ന പദ്ധതിക്ക് തുടക്കമായി.'ജലമാണ് ജീവന്‍, ജലമില്ലെങ്കില്‍ നമ്മളില്ല' എന്ന സന്ദേശവുമായി ഉദയ ക്ലബ് നടത്തുന്ന മൂന്നു മാസം നീണ്ടുനില്‍ക്കുന്ന ജലസംരക്ഷണ കാംപയിന്റെ ഭാഗമായിട്ടാണ് പദ്ധതി. ജലവിതരണോദ്ഘാടനം രാജഗോപാല്‍ എം.എല്‍.എ നിര്‍വഹിച്ചു.
പഞ്ചായത്തില്‍ ഏറ്റവും കൂടുതല്‍ കുടിവെള്ള ക്ഷാമം നേരിടുന്ന പറമ്പില്‍പീടിക, കരുവാംതടം കോളനി, ശങ്കരമാട് ഭാഗങ്ങളിലാണിപ്പോള്‍ വെള്ളമെത്തിക്കുന്നത്. കുടിവെള്ള വിതരണത്തിന് പുറമെ ഗ്രാമപഞ്ചായത്തുമായി സഹകരിച്ച് ബോധവല്‍ക്കരണം, പറവകള്‍ക്കൊരു നീര്‍ക്കുടം പദ്ധതി, കൊളാഷ് പ്രദര്‍ശനം എന്നിവ സംഘടിപ്പിച്ചതായും ഭാരവാഹികള്‍ പറഞ്ഞു. ചടങ്ങില്‍ മുനീര്‍ ചൊക്ലി, ബാലകൃഷ്ണന്‍പിള്ള, മുനീഫ്, ആമിര്‍, നൗഷാദ് സംബന്ധിച്ചു.