പാലാ: മീനച്ചിലാറ്റില്‍ കാണാതായ വിദ്യാര്‍ഥിനിയുടെ മൃതദേഹം കണ്ടെത്തി. കാഞ്ഞിരപ്പള്ളി പൊടിമറ്റം പൂവത്തേട്ട് അഞ്ജു ഷാജിയാണ് (20) മരിച്ചത്.

മണിക്കൂറുകള്‍ നീണ്ട തെരച്ചിലിനൊടുവിലാണ് പെണ്‍കുട്ടിയെ കാണാതായ ചേര്‍പ്പുങ്കല്‍ പാലത്തില്‍ നിന്നും ഒന്നരക്കിലോമീറ്റര്‍ അകലെ ചെമ്പിളാവില്‍ മൃതദേഹം കണ്ടെത്തിയത്.

കാഞ്ഞിരപ്പള്ളിയിലെ സ്വകാര്യ കോളജില്‍ ബികോം അവസാന വര്‍ഷ വിദ്യാര്‍ഥിനിയായ അഞ്ജു യൂണിവേഴ്‌സിറ്റി പരീക്ഷയെഴുതാന്‍ ശനിയാഴ്ച ചേര്‍പ്പുങ്കല്‍ കോളജിലെത്തിയിരുന്നു. പരീക്ഷയ്ക്കിടെ കോപ്പിയടിച്ചെന്ന് ആരോപിച്ച് വിദ്യാര്‍ഥിയെ കോളജ് അധികൃതര്‍ ഇറക്കിവിട്ടിരുന്നു. ഇതിനു പിന്നാലെയാണ് വിദ്യാര്‍ഥിനിയെ കാണാതായത്.

സംഭവത്തില്‍ ദുരൂഹതയുണ്ടെന്ന് മാതാപിതാക്കളും പെണ്‍കുട്ടി പഠിച്ച കോളജ് അധികൃതരും വ്യക്തമാക്കി.