സജീര്‍ കാടാച്ചിറ

കണ്ണൂര്‍: ലോക്‌സഭാ തെരഞ്ഞെടുപ്പ് പ്രചാരണത്തിനായി എ.ഐ.സി.സി ജനറല്‍സെക്രട്ടറി പ്രിയങ്ക ഗാന്ധിയെ കണ്ണൂരിലെത്തിക്കാന്‍ യു.ഡി.എഫ്. ഇതിനായി എ.ഐ.സി.സി ജനറല്‍സെക്രട്ടറി കെ.സി വേണുഗോപാലുമായി കണ്ണൂര്‍ ഡി.സി.സിയുടെ അണിയറ നീക്കം സജീവമായി. കാസര്‍കോട്, കണ്ണൂര്‍, വടകര മണ്ഡലങ്ങളില്‍ ശക്തരായ സ്ഥാനാര്‍ഥികളെയാണ് യു.ഡി.എഫ് മത്സരിപ്പിക്കുന്നത്. വടകരയില്‍ കെ. മുരളീധരന്‍ കൂടി സ്ഥാനാര്‍ഥിയായതോടെ മലബാറില്‍ തെരഞ്ഞെടുപ്പിന്റെ പ്രചാരത്തിനായി സ്റ്റാര്‍ കാംപയിനാണ് യു.ഡി.എഫ് ലക്ഷ്യമിട്ടിരിക്കുന്നത്. കാസര്‍കോട്, കണ്ണൂര്‍ ജില്ലകളില്‍ പ്രിയങ്ക ഗാന്ധിയുടെ റോഡ് ഷോയടക്കം നടത്താനാണ് ലക്ഷ്യമിടുന്നത്. മുന്‍ പ്രധാനമന്ത്രി മന്‍മോഹന്‍ സിങിനെയും പ്രചാരണത്തിനായി കണ്ണൂരിലെത്തിക്കാനുള്ള ശ്രമിത്തിലാണ് ഡി.സി.സി. പഞ്ചാബ്മന്ത്രി നവജോത് സിങ് സിന്ധു, നടി ഖുഷ്ബു, നടന്മാരായ ജഗദീഷ്, സലീംകുമാര്‍ തുടങ്ങിയവര്‍ വിവിധ ദിവസങ്ങളില്‍ പ്രചാരണത്തിനായി എത്തും. കാസര്‍കോട്, കണ്ണൂര്‍, വടകര മണ്ഡലങ്ങളിലായിരിക്കും ഇവര്‍ പ്രചാരണത്തിനെത്തുക. പ്രിയങ്ക ഗാന്ധിയെത്തിയാല്‍ പ്രചാരണം ശക്തമാക്കാനാകുമെന്നാണ് യു.ഡി.എഫ് ക്യാപിന്റെ പ്രതീക്ഷ. പെരിയയില്‍ കൊല്ലപ്പെട്ട ശരത്‌ലാല്‍, കൃപേഷ്, എടയന്നൂര്‍ ശുഹൈബ് എന്നിവരുടെ വീട് സന്ദര്‍ശിക്കാനും ഇതിലൂടെ വഴിയൊരുക്കും. ഇതു കാസര്‍കോട് സ്ഥാനാര്‍ഥി രാജ്‌മോഹന്‍ ഉണ്ണിത്താനും മുതല്‍ക്കൂട്ടാകും. പ്രിയങ്കഗാന്ധി ഉത്തര്‍പ്രദേശ് തെരഞ്ഞെടുപ്പ് പ്രചാരണത്തിനു സജീവമായതിനാല്‍ കണ്ണൂരിലെത്തിക്കാനാകുമോയെന്ന ആശങ്കയും യു.ഡി.എഫിനുണ്ട്. എല്‍.ഡി.എഫ് കണ്ണൂര്‍ പാര്‍ലമെന്റ് സ്ഥാനാര്‍ഥി പി.കെ ശ്രമതിക്കായി സി.പി.എം പോളിറ്റ് ബ്യൂറോ അംഗങ്ങളായ പ്രകാശ് കാരാട്ടും ബൃന്ദ കാരാട്ടും മറിയം ധവഌയും നേരത്തെ പ്രചാചരണത്തിനായി കണ്ണൂരിലെത്തിയിരുന്നു. ജില്ലയിലെ വിവിധ സ്ഥലങ്ങളില്‍ നടത്തിയ വനിതാ പാര്‍ലമെന്റിലും കണ്‍വഷനിലുകളിലുമാണ് ഇവര്‍ പങ്കെടുത്തത്. സി.പി.എം ദേശീയ സെക്രട്ടറി സീതാറാം യെച്ചൂരി ഏപ്രില്‍ 20നും മുഖ്യമന്ത്രി പിണറായി വിജയന്‍ 12നും എസ്. രാമചന്ദ്രന്‍ പിള്ള രണ്ടിനും ബൃന്ദാകാരാട്ട് 16നും സുഭാഷിണി അലി എട്ടിനും കണ്ണൂര്‍ മണ്ഡലത്തിലെ പ്രചാരണ പരിപാടികളില്‍ പങ്കെടുക്കും. കനയ്യ കുമാര്‍, ശബാന ഹാഷ്മി തുടങ്ങിയ സാംസ്‌കാരിക മേഖലകളില്‍ പ്രവര്‍ത്തിക്കുന്നവരും കണ്ണൂരില്‍ പ്രചരണത്തിനിറങ്ങിയേക്കും.എന്‍.ഡി.എ തെരഞ്ഞെടുപ്പ് പ്രചാരണത്തിനായി ബി.ജെ.പി പ്രമുഖരെ എത്തിക്കാനാണ് എന്‍.ഡി.എ ക്യാംപും ശ്രമിക്കുന്നത്. അഖിലേന്ത്യാ സെക്രട്ടറി വൈ. സത്യകുമാര്‍ നാളെ തെരഞ്ഞെടുപ്പ് കണ്‍വന്‍ഷനില്‍ പങ്കെടുക്കാനായി കണ്ണൂരിലെത്തും. കണ്ണൂര്‍ വിമാനത്താവളം പ്രവര്‍ത്തനമാരംഭിച്ചതോടെ കേന്ദ്ര നേതാക്കള്‍ക്കടക്കം ജില്ലയില്‍ എത്താന്‍ എളുപ്പമാണ്. അമിത് ഷാ, രാഹുല്‍ ഗാന്ധി, പിണറായി വിജയന്‍ തുടങ്ങിയവര്‍ ഇതിനകം വിമാനത്തവാളം വഴി കണ്ണൂലിറങ്ങിറയിരുന്നു.