തലശ്ശേരി: സ്ത്രീ സ്തനാര്‍ബുദ ഗവേഷണ രംഗത്ത് മികവു തെളിയിച്ച് 2018ലെ നാരീശക്തി പുരസ്‌കാരജേത്രി തൃശൂര്‍ സി-ഡെറ്റിലെ ഡോ. എ. സീമ അന്‍സാരിക്ക് മലബാര്‍ കാന്‍സര്‍ സെന്ററിന്റെ ആദരവ്. 2014ല്‍ ആരംഭിച്ച ഗവേഷണത്തിലാണ് വേര്യബ്ള്‍ ഡിവൈസ് എന്ന ഉപകരണം സ്തനാര്‍ബുദം നിര്‍ണയത്തിനായി നിര്‍മിച്ചത്. ഇന്നര്‍വെയര്‍ രീതിയിലാണ് ഉപകരണം തയാറാക്കിയത്. തലശ്ശേരി, തൃശൂര്‍ എന്നിവടങ്ങളില്‍ 117 സ്ത്രീകളില്‍ ഈ ഉപകരണം ഉപയോഗിച്ച് സ്തനാര്‍ബുദ പരിശോധനകള്‍ നടത്തിയിരുന്നു. ഇതില്‍ പോസിറ്റീവായുള്ള ചിത്രമാണ് ലഭിച്ചത്.
ചടങ്ങില്‍ ഡോ. സീമയെ എം.സി.സി ചെയര്‍മാന്‍ ഡോ. ബാബുരവീന്ദ്രന്‍ മൊമന്റോ നല്‍കി ആദരിച്ചു. തൃശൂര്‍ സി-മെറ്റ് ഡയരക്ടര്‍ ഡോ. എന്‍ രഘുവിനേയും ആദരിച്ചു. എം.സി.സി ഡയരക്ടര്‍ ഡോ. ബി. സതീശന്‍, ഡോ. കെ. സംഗീത നായനാര്‍, ഡോ. സജിത്ത് ബാബു സംസാരിച്ചു. ഉപകരണത്തില്‍ പരിശോധനയ്ക്ക് വിധേയരായ ജീവനക്കാര്‍ ഉള്‍പ്പെടെയുള്ളവര്‍ അവരുടെ അനുഭവങ്ങളും തുറന്ന സ്റ്റേജില്‍ പങ്കുവച്ചു.