ചെറുതുരുത്തി: വള്ളത്തോള്‍ നഗര്‍ പഞ്ചായത്തിലെ നമ്പ്യാര്‍ പള്ളത്ത് തെരുവ് നായ്ക്കളുടെ ആക്രമണത്തില്‍ വയോധികനടക്കം മൂന്ന് പേര്‍ക്ക് കടിയേറ്റു.
നമ്പ്യാര്‍ പള്ളം സ്വദേശികളായ വട്ടപറമ്പില്‍ വീട്ടില്‍ അലിയാര്‍(70). മാവടിയില്‍ മുഹമ്മദ് ഇബ്രാഹിമിന്റെ ഭാര്യ സൈനബ (34),പള്ളിയ്ക്കല്‍ സ്വദേശി നായാട്ട് വളപ്പില്‍ സൈതലവി (25) എന്നിവര്‍ക്കാണ് കടിയേറ്റത്.
ആക്രമണകാരിയായ നായയില്‍ നിന്ന് രക്ഷപ്പെടാന്‍ ഓടുന്നതിനിടെ വീണ് പരുക്കേറ്റ് മാവടിയില്‍ ഫാത്തിമ (65)യ്ക്ക് നിസാര പരുക്കേറ്റിട്ടുണ്ട്. ഇന്നലെ ഉച്ചതിരിഞ്ഞ് 12 മണിയോടെയാണ് സംഭവം. സൈനബയുടെ വീട്ടിലേയ്ക്ക് ഓടികയറിയ തെരുവ് നായ ആദ്യം സൈനബയെയാണ് കടിച്ചത്. ഇതിനിടയിലായിരുന്നു ഫാത്തിമയ്ക്ക് വീണ് പരുക്കേറ്റത്.
തുടര്‍ന്നും ഭീതി വിതച്ച് ഓടിയ നായ പള്ളിയില്‍ നിസ്‌ക്കാരം കഴിഞ്ഞ് വരികയായിരുന്ന അലിയാരേയും കടിച്ചു.
തുടര്‍ന്നാണ് പുഴയില്‍ കുളിയ്ക്കാനെത്തിയ സെയ്തലവിയെ ആക്രമിച്ചത്. മൂന്ന് പേരെയും മുളങ്കുന്നത്ത്കാവ് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച് പ്രാഥമിക ചികിത്സ നല്‍കി.