പുതുക്കാട്: ജില്ലയിലെ പ്രമുഖ ജല സംഭരണികളില്‍ ഒന്നായ ചിമ്മിനി ഡാമിലെ സ്ഥിതി കൂടുതല്‍ ആശങ്കാജനകം.
ഇന്നലെ രാവിലെ വരെയുള്ള അളവനുസരിച്ച് 5.08 ദശ ലക്ഷം ക്യുബിക്ക് മീറ്റര്‍ വെള്ളം മാത്രമാണ് ഡാമില്‍ ശേഷിക്കുന്നത്. കഴിഞ്ഞ വര്‍ഷം ഇതേ ദിവസം 79.42 ദശലക്ഷം ക്യുബിക്ക് മീറ്റര്‍ ജലം ഉണ്ടായിരുന്ന സ്ഥാനത്താണിത്. ജില്ലാ ഭരണകൂടത്തിന്റെ നിര്‍ദ്ദേശമനുസരിച്ച് ഇതില്‍ നിന്നും ദിനംപ്രതി 0.02 ദശലക്ഷം ക്യുബിക്ക് മീറ്റര്‍ വെള്ളം തുറന്നു വിടുന്നുമുണ്ട്.
ഇത് നിര്‍ത്തിയാല്‍ കുടിവെള്ള വിതരണത്തിനായി വാട്ടര്‍ അതോറിറ്റി നടത്തുന്ന പമ്പിങ്ങിനെ ബാധിക്കും എന്നതിനാല്‍ കഴിയുന്നിടത്തോളം തുടരാനാണ് നിലവിലെ തീരുമാനം. ഇപ്പോഴത്തെ കണക്കനുസരിച്ച് അടുത്ത 15 ദിവസത്തേക്ക് കൂടി നിലവിലെ രീതിയില്‍ ജലം വിട്ടുകൊടുക്കാന്‍ കഴിഞ്ഞേക്കും. 1980 ല്‍ സ്ഥാപിതമായ ഡാമിന്റെ ജലസംഭരണ ശേഷി 179 ദശലക്ഷം ക്യുബിക്ക് മീറ്ററാണ്. എന്നാല്‍ 154 ദശലക്ഷം വരെയേ സംഭരിക്കാറുള്ളു. ഇപ്പോള്‍ ശേഷിക്കുന്നത് 5.08 ദശലക്ഷം ക്യുബിക്ക് മീറ്റര്‍ ജലം ആണെങ്കിലും അതില്‍ 2.85 ദശലക്ഷം ക്യുബിക്ക് മീറ്റര്‍ ജലവും ഉപയോഗിക്കാനാവില്ല.