ന്യൂഡല്‍ഹി: പാര്‍ട്ടി ആവശ്യപ്പെട്ടാല്‍ മല്‍സരിക്കാന്‍ തയാറാണെന്ന് കോണ്‍ഗ്രസ് ജനറല്‍ സെക്രട്ടറി പ്രിയങ്കാ ഗാന്ധി. മല്‍സരിക്കണോ വേണ്ടയോ എന്ന കാര്യത്തില്‍ ഇതുവരെ തീരുമാനമെടുത്തിട്ടില്ല.
പക്ഷേ, മല്‍സരിക്കണമെന്ന് പാര്‍ട്ടി പറഞ്ഞാല്‍ മല്‍സരിക്കും. പാര്‍ട്ടിക്കു വേണ്ടി സേവനം ചെയ്യാനാണ് ആഗ്രഹിക്കുന്നതെന്നും അവര്‍ പറഞ്ഞു.
കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയുടെ മണ്ഡലമായ അമേഠിയില്‍ മാധ്യമങ്ങളുടെ ചോദ്യത്തോടു പ്രതികരിക്കുകയയിരുന്നു അവര്‍. അമ്മയും യു.പി.എ അധ്യക്ഷയുമായ സോണിയാഗാന്ധിയുടെ മണ്ഡലമായ റായ്ബറേലിയില്‍ പ്രിയങ്ക മല്‍സരിക്കുമെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു.
എന്നാല്‍, റായ്ബറേലിയില്‍ സോണിയയെ സ്ഥാനാര്‍ത്ഥിയായി പ്രഖ്യാപിച്ച് കഴിഞ്ഞയാഴ്ച കോണ്‍ഗ്രസ് പട്ടിക പുറത്തുവിട്ട പശ്ചാത്തലത്തില്‍ പ്രിയങ്ക, മല്‍സരിച്ചേക്കില്ലെന്ന സൂചനകള്‍ ഉയര്‍ന്നു.
ഇതിനു പിന്നാലെയാണ് പാര്‍ട്ടി പറഞ്ഞാല്‍ മല്‍സരിക്കുമെന്ന് പ്രിയങ്ക അറിയിച്ചത്.