കോട്ടക്കല്‍: സംസ്ഥാന സര്‍ക്കാര്‍ തെരഞ്ഞെടുപ്പ് ചട്ടം ലംഘിക്കുകയാണെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്.
ക്ഷേമ പെന്‍ഷന്‍ വിതരണം സി.പി.എം പരിപാടിയാക്കി മാറ്റി അധികാര ദുര്‍വിനിയോഗം നടത്തുകയാണ്. സഹകരണ ബാങ്കുകള്‍ വഴി പെന്‍ഷന്‍ വിതരണം നടത്തുന്നത് പാര്‍ട്ടി പ്രചാരണത്തിന് ഉപയോഗിക്കുന്നു.
പലയിടത്തും സി.പി.എം പ്രവര്‍ത്തകരാണ് പെന്‍ഷന്‍ വിതരണം നടത്തുന്നത്. ഇടത് സ്ഥാനാര്‍ഥിയുടെ വകയുള്ള പണമാണെന്ന് പറഞ്ഞുവരെ പെന്‍ഷന്‍ വിതരണം ചെയ്യുന്നുണ്ട്. തെരഞ്ഞെടുപ്പ് പ്രചാരണത്തിനുള്ള സ്‌ക്വാഡുകള്‍ തന്നെ പെന്‍ഷന്‍ വിതരണം ചെയ്യുന്നു.
പബ്ലിക് റിലേഷന്‍സ് വകുപ്പ് വഴി കോടിക്കണക്കിന് രൂപ ചെലവിട്ട് അച്ചടിച്ച പുസ്തകങ്ങളും പ്രചാരണ സാമഗ്രികളും ഇലക്ഷന്‍ സ്‌ക്വാഡ് വര്‍ക്കിന് ഉപയോഗിക്കുകയാണെന്നും അദ്ദേഹം പറഞ്ഞു.