വാഷിങ്ടണ്‍: ആണവായുധ വിഷയത്തില്‍ ഉത്തര കൊറിയയുമായുള്ള ചര്‍ച്ചകള്‍ നല്ല നിലയില്‍ മുന്നോട്ടുപോകുന്നുവെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. ഔദ്യോഗിക ട്വിറ്റര്‍ അക്കൗണ്ടിലൂടെയാണ് ട്രംപ് ഇക്കാര്യം അറിയിച്ചത്.

കഴിഞ്ഞ എട്ടു മാസത്തോളമായി ട്രംപ് റോക്കറ്റ് വിക്ഷേപിക്കുകയോ ആണവ പരീക്ഷണം നടത്തുകയോ ചെയ്തിട്ടില്ല. ഉ.കൊറിയയുമായി നിരവധി നല്ല കൂടിക്കാഴ്ചകളാണു നടക്കുന്നത്. എല്ലാം നല്ല നിലക്കു മുന്നോട്ടുപോകുന്നു-ട്രംപ് ട്വീറ്റ് ചെയ്തു.
ആണവ നിരായുധീകരണവുമായി ബന്ധപ്പെട്ട് ഇരുരാജ്യങ്ങളുടെയും നേതാക്കള്‍ തമ്മില്‍ നടക്കുന്ന സംഭാഷണങ്ങള്‍ നല്ല നിലയിലാണു മുന്നോട്ടുപോകുന്നതെന്ന് വൈറ്റ് ഹൗസ് വൃത്തങ്ങളും അറിയിച്ചു.
എന്നാല്‍, ഉ.കൊറിയ തങ്ങളുടെ ആയുധശേഷി വര്‍ധിപ്പിക്കുന്നതായുള്ള യു.എസ് ഇന്റലിജന്‍സിന്റെ നിരീക്ഷണത്തെ കുറിച്ച് വൈറ്റ് ഹൗസ് പ്രതികരിച്ചിട്ടില്ല.