പുല്‍പ്പള്ളി: ആദിവാസികള്‍ക്ക് വീട് നിര്‍മിച്ചു നല്‍കുമെന്ന വാശിയിലാണ് ഭരണകര്‍ത്താക്കളും, ഉദ്യോഗസ്ഥരും. ഇവരോടൊപ്പം കരാറുകാരും ഉഷാറായി രംഗത്തുണ്ട്. നിര്‍മ്മാണം തുടങ്ങിയവയില്‍ എത്രയെണ്ണം പൂര്‍ത്തിയായിട്ടുണ്ടെന്നു ചോദിച്ചാല്‍ ഉദ്യോഗസ്ഥരുടെ കണക്കുകളില്‍ എല്ലാം പൂര്‍ത്തിയായി.
എന്നാല്‍ ഇതിന്റെ നിജസ്ഥിതി അറിയണമെങ്കില്‍ ജില്ലയിലെ ഓരോ ആദിവാസി കോളനികളിലും കയറി ഇറങ്ങണം. പുല്‍പ്പള്ളി പഞ്ചായത്തിലെ പതിനാറാം വാര്‍ഡില്‍ ഇത്തരം പൂര്‍ത്തിയാകാത്ത വീടുകള്‍ മാത്രമുള്ള ഒരു ആദിവാസി കോളനിയുണ്ട്.
കാപ്പിക്കുന്നിലെ പുതിയിടം പണിയ കോളനി. നെയ്ക്കുപ്പ വനത്തോട് ചേര്‍ന്നാണ് പുതിയിടം പണിയ കോളനി. കഴിഞ്ഞ 10 വര്‍ഷങ്ങള്‍ക്കുള്ളില്‍ കോളനിയിലെ മുഴുവന്‍ കുടുംബങ്ങള്‍ക്കും വീട് നിര്‍മിച്ചു നല്‍കിയതായാണ് സര്‍ക്കാര്‍ രേഖകളിലുള്ളത്.
വീടുകള്‍ നിര്‍മ്മിച്ചുവെന്നത് യാഥാര്‍ഥ്യമാണ്.എന്നാല്‍ ഇവയില്‍ എത്രയെണ്ണം വാസയോഗ്യമായി ഉണ്ടെന്ന ചോദ്യത്തിന് ഒരു വീട് പോലുമില്ലെന്നതാണ് യാഥാര്‍ത്യം. സര്‍ക്കാര്‍ കണക്കില്‍ ഒരു ലക്ഷം മുതല്‍ മൂന്ന് ലക്ഷംരൂപ വരെ മുടക്കി നിര്‍മിച്ച വീടുകളാണ് ഒന്നിനും കൊള്ളാത്ത അവസ്ഥയിലുള്ളത്.
വീടുകളില്‍ പലതും പൂര്‍ത്തിയാക്കാതെ പണവും വാങ്ങി കരാറുകാര്‍ മുങ്ങിയതാണ്. രേഖകളില്‍ ഗുണഭോക്താവ് തന്നെയാണ് കരാറുകാരന്‍, അതുകൊണ്ടുതന്നെ യഥാര്‍ത്ത വെട്ടിപ്പുകാരനെ ശിക്ഷിക്കുവാനും വകുപ്പില്ല.
പുതിയിടം കോളനിയിലെ പല വീടുകളുടെയും കരാറുകാരന്‍ അക്കാലത്തെ വാര്‍ഡംഗത്തിന്റെ ഭര്‍ത്താവായിരുന്നു. പിന്നീട് പഞ്ചായത്ത് പ്രസിഡന്റായ ആളും കോളനിയില്‍ അക്കാലത്ത് കരാറുകാരനായി ഉണ്ടായിരുന്നു.
നിരക്ഷരരായ ആദിവാസികള്‍ക്ക് ഈ വെട്ടിപ്പിനെതിരെ ഒന്നും ചെയ്യുവാന്‍ കഴിയുമായിരുന്നില്ല. ആദിവാസി വകുപ്പുദ്യോഗസ്ഥരും കരാറുകാരും, ഭരണകര്‍ത്താക്കളും ചേര്‍ന്ന അച്ചുതണ്ടായിരുന്നു ഈ വെട്ടിപ്പുകള്‍ക്കു പിന്നിലുണ്ടായിരുന്നത്.
ഒരിക്കല്‍ വീടുകിട്ടിയവരാണെന്ന കാരണത്താല്‍ പുതിയ വീടുകള്‍ അനുവദിക്കുവാന്‍ അധികൃതര്‍ തയാറാകുന്നുമില്ല. മുമ്പ് വൈക്കോല്‍ മേഞ്ഞതാണെങ്കിലും ചോരാത്ത വീട് ഇവര്‍ക്കുണ്ടായിരുന്നു.
ഇന്ന് ആധുനിക വീടുകള്‍ വന്നതോടെ ചോര്‍ന്നൊലിക്കുന്ന വീടുകളാണ് പുതിയിടം കോളനിക്കാര്‍ക്കുള്ളത്.