കോടാലി: സുപ്രസിദ്ധ പണ്ഡിതനും സൂഫിവര്യനുമായ കോടാലി അശൈഖ് അബ്ദുറഹ്മാന്‍ വലിയുള്ളാഹിയുടെ പേരില്‍ എല്ലാ വര്‍ഷവും വിപുലമായി നടത്തപ്പെടുന്ന കോടാലി മഖ്ബറ ആണ്ടുനേര്‍ച്ചക്ക് നാളെ തുടക്കമാവും. നാളെ ജുമുഅ നമസ്‌കാരാനന്തരം പതാക ഉയര്‍ത്തുന്നതോടെയാണ് മൂന്ന് ദിവസം നീണ്ടു നില്‍ക്കുന്ന പരിപാടികള്‍ക്ക് തുടക്കം കുറിക്കുക. രാത്രി ഏഴിന് നടക്കുന്ന മതപ്രഭാഷണം സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം എം.എം മുഹ്‌യിദ്ദീന്‍ മൗലവി ആലുവ ഉദ്ഘാടനം ചെയ്യും. കോടാലി മഹല്ല് ഖത്തീബ് അബൂബക്കര്‍ ഫൈസി അധ്യക്ഷനാവും. ഫരീദ് റഹ്മാനി കാളികാവ് മഹാന്‍മാരുടെ പ്രാര്‍ഥനകള്‍ എന്ന വിഷയത്തില്‍ മുഖ്യപ്രഭാഷണം നടത്തും. 23ന് നടക്കുന്ന സമാപന സമ്മേളനം രാത്രി ഏഴിന് പാണക്കാട് സയ്യിദ് ഷമീറലി ശിഹാബ് തങ്ങള്‍ ഉദ്ഘാടനം ചെയ്യും. മഹല്ല് പ്രസിഡന്റ് സിറാജുദ്ദീന്‍ വലിയകത്ത് അധ്യക്ഷനാവും. മൂന്ന് ദിവസങ്ങളിലായി ആയിരങ്ങള്‍ പങ്കെടുക്കുന്ന പരിപാടിയില്‍ വിവിധ മഹല്ലുകളിലെ ഖത്തീബുമാര്‍, സംഘടനാ ഭാരവാഹികള്‍ എന്നിവരും സംബന്ധിക്കുമെന്ന് ആണ്ടുനേര്‍ച്ച കമ്മിറ്റി ചെയര്‍മാന്‍ ഹക്കീം കളിപറമ്പില്‍, ജന:കണ്‍വീനര്‍ സനൂപ് പോക്കാക്കില്ലത്ത്, ട്രഷറര്‍ നാദിര്‍ഷ നാസര്‍ എന്നിവര്‍ അറിയിച്ചു.