മുംബൈ: പ്രശസ്ത ബോളിവുഡ് നടന്‍ സുശാന്ത് സിങ് രാജ്പുതിനെ മരിച്ച നിലയില്‍ കണ്ടെത്തി. മരണം ആത്മഹത്യയാണെന്നു വ്യക്തമാക്കിയ മുംബൈ പൊലിസ്, വിഷയത്തില്‍ അന്വേഷണം പ്രഖ്യാപിച്ചിട്ടുണ്ട്.

ഇന്നലെ മുംബൈയിലെ ബാന്ദ്രയില്‍ സ്വന്തം വസതിയിലാണ് 34കാരനായ സുശാന്തിനെ തൂങ്ങിമരിച്ച നിലയില്‍ കണ്ടെത്തിയത്. ആത്മഹത്യാ കുറിപ്പ് കണ്ടെത്തിയിട്ടില്ല. ക്രിക്കറ്റ് താരം എം.എസ് ധോണിയുടെ ജീവിത കഥ പറഞ്ഞ സിനിമയിലടക്കം പ്രധാന വേഷം ചെയ്ത സുശാന്ത്, ബോളിവുഡില്‍ നിരവധി സിനിമകളില്‍ അഭിനയിച്ചിട്ടുണ്ട്.

ടെലിവിഷന്‍ സീരിയിലുകളിലൂടെയാണ് സുശാന്ത് അഭിനയരംഗത്തെത്തിയിരുന്നത്. 1986ല്‍ ബിഹാറിലെ പൂര്‍ണിയയിലായിരുന്നു ജനനം. എന്‍ജിനീയറിങ് പഠനത്തിനായി ഡല്‍ഹിയിലേക്കു പോയെങ്കിലും പാതിവഴിയില്‍ പഠനം നിര്‍ത്തി അഭിനയരംഗത്തേക്ക് പ്രവേശിക്കുകയായിരുന്നു. നേരത്തെ, സുശാന്തിന്റെ മുന്‍ മാനേജര്‍ ദില്‍ഷ  സലിന്‍ ദിവസങ്ങള്‍ക്കു മുന്‍പ് ദുരൂഹസാഹചര്യത്തില്‍ സുഹൃത്തിന്റെ വീടിനു മുകളില്‍നിന്നു വീണ് മരിച്ചിരുന്നു. ഇത് അബദ്ധത്തില്‍ സംഭവിച്ചതാണെന്നും ആത്മഹത്യയാണെന്നും റിപ്പോര്‍ട്ടുണ്ടായിരുന്നു.

നടന്റെ മരണത്തില്‍ പ്രധാനമന്ത്രി നരേന്ദ്രമോദിയും സിനിമാ രംഗത്തെ പ്രമുഖരുമടക്കം ഒട്ടേറെ പേര്‍ അനുശോചനം രേഖപ്പെടുത്തി.