തൊടുപുഴ: കാഴ്ച വൈകല്യമുള്ളയാളുടെ പക്കല്‍ നിന്നും പണമടങ്ങിയ ബാഗ് തട്ടിയെടുത്ത സ്ത്രീ പിടിയില്‍. കോടിക്കുളം സ്വദേശിനി കുമാരി(45) ആണ് അറസ്റ്റിലായത്.
ഇന്നലെ ഉച്ചകഴിഞ്ഞ ് മൂന്നിനായിരുന്നു സംഭവം. തൊടുപുഴ ശ്രീകൃഷ്ണസ്വാമി ക്ഷേത്രത്തിന് സമീപം ജ്യോതിഷാലയം നടത്തുന്ന നീലകണ്ഠന്‍ ഇളയതിന്റെ ബാഗാണ് ഇവര്‍ കവര്‍ന്നത്. ഇദ്ദേഹത്തിന്റെ വീട്ടില്‍ മുന്‍പ് ഈ സ്ത്രീ ജോലിക്ക് നിന്നിട്ടുണ്ട്. ഇന്നലെ ഇവര്‍ ജ്യോതിഷാലയത്തിലെത്തിയപ്പോഴാണ് ബാഗുമായി കടന്നത്. ബാഗ് കാണാതായതോടെ നീലകണ്ഠന്‍ ഇളയത് പൊലിസില്‍ വിവരം അറിയിച്ചു. ഇതോടെ സ്ഥലത്ത് വന്നവരെ കേന്ദ്രീകരിച്ച് അന്വേഷിച്ചപ്പോഴാണ് കുമാരിയിലേയ്ക്ക് സംശയം നീണ്ടത്. ഇതിനിടെ കുമാരി പ്രശ്‌നമായേക്കുമെന്ന് കരുതി ബാഗ് ഒരിടത്തേക്ക് മാറ്റിയിരുന്നു. കുമാരിയെ പിടികൂടിയ ശേഷം ഇത് പൊലിസ് കണ്ടെടുത്തു. 9,900 രൂപയും തിരിച്ചറിയല്‍ രേഖകളുമാണ് ബാഗില്‍ ഉണ്ടായിരുന്നത്.