ഇറക്കുമതി ചെയ്യുന്ന മത്സ്യങ്ങളിലാണ് ഫോര്‍മാലിന്‍ കണ്ടെത്തിയതെങ്കിലും പൊതുജനങ്ങളില്‍ ആശങ്ക നിലനില്‍ക്കുന്നതിനാലാണ് വ്യാപാരത്തില്‍ തോതില്‍ കുറവുണ്ടായിരിക്കുന്നത്
കണ്ണൂര്‍: ഇതരസംസ്ഥാനത്തു നിന്നെത്തുന്ന മത്സ്യത്തില്‍ ഫോര്‍മാലിന്‍ കലര്‍ത്തുന്നതായുള്ള ആശങ്കയെ തുടര്‍ന്ന് മത്സ്യത്തിന് ആവശ്യക്കാര്‍ കുറയുന്നു.
ഇറക്കുമതി ചെയ്യുന്ന മത്സ്യങ്ങളിലാണ് ഫോര്‍മാലിന്‍ കണ്ടെത്തിയതെങ്കിലും പൊതുജനങ്ങളില്‍ ആശങ്ക നിലനില്‍ക്കുന്നതിനാലാണ് വ്യാപാരത്തില്‍ തോതില്‍ കുറവുണ്ടായിരിക്കുന്നത്. ഇതോടെ വിപണി മന്ദഗതിയിലായിട്ടുണ്ട്. ജില്ലയിലെ ഭൂരിഭാഗം മത്സ്യമാര്‍ക്കറ്റുകളിലും വില കുറച്ചാണ്് വില്‍പ്പന നടത്തുന്നത്.
ട്രോളിങ് നിരോധനമുള്ള സമയത്ത് തമിഴ്‌നാട് കേന്ദ്രീകരിച്ചാണ് കൂടുതലും മത്സ്യങ്ങള്‍ കണ്ണൂര്‍ ജില്ലയിലെത്തുന്നത്.
കഴിഞ്ഞദിവസം 80-70 രൂപ നിരക്കിലാണ് തമിഴ്‌നാട്ടില്‍ നിന്ന് മത്തി എത്തിയത്. ഇവിടെ നിന്നെത്തിയ അയല 90-110 രൂപയ്ക്കാണ് വില്‍പന നടത്തിയത്.
എന്നാല്‍ ജില്ലയിലെ തീരപ്രദേശത്തു നിന്ന് പിടിച്ച അയലക്ക് കിലോയ്ക്ക് 130 രൂപയാണ് കച്ചവടക്കാര്‍ ഈടാക്കിയത്.
നേരത്തെ വന്‍തോതില്‍ വിലയുയര്‍ന്ന മത്സ്യങ്ങള്‍ പലതിനും വില കുത്തനെ കുറഞ്ഞിട്ടുണ്ട്.
മൂന്നാഴ്ച്ച മുമ്പ് വരെ മാര്‍ക്കറ്റില്‍ 1000 രൂപ വരെ ഉണ്ടായിരുന്ന അയക്കൂറക്ക് ഇപ്പോള്‍ 600 രൂപയാണ് വില. ആവോലി 400, 500 എന്നിങ്ങനെയാണ് വില. പൊതുവെ ലഭ്യത കുറഞ്ഞ സ്രാവിന് 300 രൂപയുമാണ്.
പൊതുവെ കേരള തീരങ്ങളിലില്ലാത്ത തിരണ്ടിക്ക് 250 രൂപയുണ്ടായിരുന്നു. ഇപ്പോള്‍ 180 രൂപയ്ക്കാണ് വില്‍പന നടക്കുന്നത്.
അതേസമയം ട്രോളിങ് നിരോധനത്തില്‍ നിന്ന് നേരിയ ആശ്വാസമായി കഴിഞ്ഞദിവസം ചെറുകിട വള്ളക്കാര്‍ക്ക് വലനിറച്ച് ചെമ്മീന്‍ കോളെത്തി.
ജില്ലയിലെ പല തീരത്തുനിന്നും മത്സ്യ ബന്ധനത്തിന് പോയ ചെറുകിട വള്ളങ്ങള്‍ക്കാണ് വലനിറയെ ചെമ്മീന്‍ ലഭിച്ചത്.
ചില വള്ളങ്ങള്‍ക്ക് 50 കി.ഗ്രാം വരെ ചെമ്മീന്‍ ലഭിച്ചു. മത്സ്യവില്‍പന കുറഞ്ഞതിനിടെ ചിക്കന്‍, ബീഫ് വില വര്‍ധിച്ചിട്ടുണ്ട്.