ഇരിട്ടി: ലിഫ്റ്റില്‍ കുടുങ്ങിയ ലോഡ്ജ് ജീവനക്കാരനെ അഗ്നിശമന സേന രക്ഷപ്പെടുത്തി. ഇന്നലെ രാവിലെ എട്ട് മണിയോടെ ഇരിട്ടി നേരംമ്പോക്ക് റോഡിലുള്ള സ്വകാര്യ ലോഡ്ജിലാണ് സംഭവം. ലിഫ്റ്റില്‍ കുടുങ്ങിയ റിസപ്ഷനിസ്റ്റായ ക്ലിന്റ് ജെയിംസി(26)നെയാണ് ഇരിട്ടി അഗ്‌നിശമന സേനാവിഭാഗം രക്ഷപ്പെടുത്തിയത്.
ലോഡ്ജിന്റെ മുകള്‍നിലയിലേക്ക് പോകുന്നതിനായി യുവാവ് ലിഫ്റ്റില്‍ കയറി രണ്ടാം നിലയിലെത്തും മുന്നേ വൈദ്യുതി ബന്ധം നിലക്കുകയും ലിഫ്റ്റ് പ്രവര്‍ത്തനം നിലയ്ക്കുകയുമായിരുന്നു. പിന്നീട് ലോഡ്ജിലെ ജനറേറ്റര്‍ പ്രവര്‍ത്തിപ്പിച്ചിട്ടും തകരാറിലായ ലിഫ്റ്റ് പ്രവര്‍ത്തിക്കാത്തതിനെ തുടന്ന് മാനേജര്‍ ഫയര്‍ഫോഴ്‌സിനെ വിവരമറിയിക്കുകയായിരുന്നു.
ഫയര്‍ഫോഴ്‌സ് അര മണിക്കൂര്‍ നേരത്തെ പരിശ്രമത്തിനുശേഷം ലിഫ്റ്റിന്റെ വാതിലുകള്‍ അകത്തി യുവാവിനെ രക്ഷപ്പെടുത്തുകയായിരുന്നു.
ഇരിട്ടി ഫയര്‍ഫോഴ്‌സ് സ്റ്റേഷന്‍ ഓഫിസര്‍ ജോണ്‍സന്‍ പീറ്ററുടെ നേതൃത്വത്തില്‍, ലീഡിങ് ഫയര്‍മാന്‍ ഫിലിപ്പ് മാത്യു, ഫയര്‍മാന്‍മാരായ വിജീഷ്, സന്ദീപ്, ഷാനിഫ്, പ്രവീണ്‍ കുമാര്‍, ഹോം ഗാര്‍ഡ് രമേശന്‍ എന്നിവരുടെ സംഘമാണ് യുവാവിനെ രക്ഷപ്പെടുത്തിയത്.