ഹൈദരാബാദ്: ഐ.പി.എല്ലിലെ സൂപ്പര്‍ പോരാട്ടത്തില്‍ ഡല്‍ഹി ഡെയര്‍ഡെവിള്‍സിനെതിരേ സണ്‍റൈസേഴ്‌സ് ഹൈദരാബാദിന് 15 റണ്‍സിന്റെ വിജയം. ടോസ് നേടി ആദ്യം ബാറ്റ് ചെയ്ത ഹൈദരാബാദ് നാലു വിക്കറ്റ് നഷ്ടത്തില്‍ അടിച്ചുകൂട്ടിയ 191 റണ്‍സെന്ന കൂറ്റന്‍ സ്‌കോറിന് മുന്‍പില്‍ ഡല്‍ഹി ഡെയര്‍ഡെവിള്‍സ് പരാജയപ്പെടുകയായിരുന്നു.
കെയ്ന്‍ വില്യംസന്‍(89) ശിഖര്‍ ധവാന്‍(70) എന്നിവരുടെ അര്‍ധസെഞ്ച്വറികളുടെ ബലത്തിലാണ് ഹൈദരാബാദ് വിജയം കരസ്ഥമാക്കിയത്. മികച്ച ഫോമിലുള്ള ഹൈദരാബാദ് ക്യാപ്റ്റന്‍ ഡേവിഡ് വാര്‍ണര്‍(4) സ്‌കോര്‍ 12ല്‍ നില്‍ക്കെ പുറത്തായി. ക്രിസ് മോറിസ് അമിത് മിശ്രയുടെ കൈകളില്‍ എത്തിക്കുകയായിരുന്നു വാര്‍ണറെ. എന്നാല്‍ പീന്നീട് ധവാന് കൂട്ടായെത്തിയ വില്യംസന്‍ മത്സരത്തെ മുന്നോട്ടു കൊണ്ട് പോകുന്നതാണ് കണ്ടത്. ധവാന്‍ താളം കണ്ടെത്താന്‍ പാടുപെട്ടപ്പോള്‍ വില്യംസന്‍ അനായാസം ബൗണ്ടറി കണ്ടെത്തി. 51 പന്തില്‍ ആറു ബൗണ്ടറിയും അഞ്ചു സിക്‌സറുമടങ്ങുന്നതാണ് വില്യംസന്റെ ഇന്നിങ്‌സ്.
ധവാന്‍-വില്യംസന്‍ സഖ്യം 136 റണ്‍സിന്റെ കൂട്ടുകെട്ടാണ് ഉണ്ടാക്കിയത്. ധവാന്‍ 50 പന്തില്‍ ഏഴു ബൗണ്ടറിയും ഒരു സിക്‌സറുമടിച്ചു. 17ാമതെ ഓവറിലെ വില്യംസനെ പുറത്താക്കി മോറിസാണ് ഈ കൂട്ടുകെട്ട് പൊളിച്ചത്. തൊട്ടടുത്ത ഓവറില്‍ ധവാനെയും യുവരാജ് സിങി(3)നെയും താരം മടക്കി. മത്സരത്തില്‍ നാലോവറില്‍ 26 റണ്‍സ് വഴങ്ങി മോറിസ് നാലു വിക്കറ്റെടുത്തു. മത്സരത്തില്‍ ഹൈദരാബാദിന് നഷ്ടമായ വിക്കറ്റുകളെല്ലാം സ്വന്തമാക്കിയത്. മോറിസാണ്. അവസാന നിമിഷം മോയ്‌സസ് ഹെന്റിക്‌സ്(12*) ദീപക് ഹൂഡ(9) എന്നിവര്‍ നടത്തിയ വെടിക്കെട്ടാണ് സ്‌കോര്‍ 190 കടത്തിയത്.
മറുപടി ബാറ്റിങ്ങിനിറങ്ങിയ ഡല്‍ഹിക്ക് അഞ്ച് വിക്കറ്റ് നഷ്ടത്തില്‍ 176 റണ്‍സെടുക്കാനേ സാധിച്ചുള്ളൂ. ഡല്‍ഹിക്കുവേണ്ടി സഞ്ജു സാംസണും (42), ശ്രേയസ് അയ്യരും (50) പൊരുതിയെങ്കിലും ഹൈദരാബാദിന്റെ കൂറ്റന്‍ സ്‌കോറിന് മുന്‍പില്‍ പിടിച്ചുനില്‍ക്കാനായില്ല. കരുണ്‍ നായറും (33) മാത്യൂസും (31) അവസാന ഓവറുകളില്‍ വമ്പനടികള്‍ക്ക് മുതിര്‍ന്നെങ്കിലും ഹൈദരാബാദിന്റെ മികച്ച ബോളിങ് കരുത്തിന് മുന്‍പില്‍ പരാജയപ്പെടുകയായിരുന്നു.