നെടുമ്പാശ്ശേരി: രാജ്യാന്തര വിമാനത്താവളം വഴി സ്വര്‍ണം കടത്താനുള്ള ശ്രമത്തിനിടെ രണ്ട് പേര്‍ കസ്റ്റംസ് എയര്‍ ഇന്റലിജന്‍സ് വിഭാഗത്തിന്റെ പിടിയിലായി. വിദേശത്ത് നിന്നും മിശ്രിത രൂപത്തില്‍ സ്വര്‍ണം കൊണ്ടുവന്ന യാത്രക്കാരനും, സ്വര്‍ണം ഏറ്റുവാങ്ങാന്‍ വിമാനത്താവളത്തില്‍ എത്തിയ വ്യക്തിയുമാണ് പിടിയിലായത്. 1.09 കിലോഗ്രാം സ്വര്‍ണ മിശ്രിതമാണ് കസ്റ്റംസ് പിടിച്ചെടുത്തത്.

ഇന്നലെ പുലര്‍ച്ചെ ദുബൈയില്‍ നിന്നും നെടുമ്പാശ്ശേരിയിലെത്തിയ ഫ്‌ളൈ ദുബൈ വിമാനത്തിലെ യാത്രക്കാരനായ കൊണ്ടോട്ടി സ്വദേശി ഹബീബ് റഹ്മാനാണ് സ്വര്‍ണ മിശ്രിതവുമായി ആദ്യം പിടിയിലായത്.പിന്നീട് ഇയാളില്‍ നിന്നും സ്വര്‍ണം ഏറ്റുവാങ്ങാന്‍ വിമാനത്താവളത്തിലെത്തിയ കോഴിക്കോട് സ്വദേശി മെഹബൂബ് അലിയും പിടിയിലാവുകയായിരുന്നു. ഇയാള്‍ എത്തിയ ഇന്നോവ കാറും കസ്റ്റംസ് കസ്റ്റഡിയിലെടുത്തിട്ടുണ്ട്. മലദ്വാരത്തിലും അരയിലുമായിരുന്നു സ്വര്‍ണ മിശ്രിതം ഒളിപ്പിച്ചിരുന്നത്. പ്രത്യേകം പൗച്ചിലാക്കിയാണ് അരയില്‍ ചുറ്റിയിരുന്നത്.

പിടിച്ചെടുത്ത സ്വര്‍ണ മിശ്രിതത്തില്‍ നിന്നും ഏകദേശം 32 ലക്ഷം രൂപ വിലവരുന്ന ഒരു കിലോഗ്രാം സ്വര്‍ണം വേര്‍തിരിച്ചെടുക്കാനാകും. രണ്ടേകാല്‍ കിലോഗ്രാം സ്വര്‍ണ മിശ്രിതവുമായി തിരുവനന്തപുരം സ്വദേശി ബുധനാഴ്ച നെടുമ്പാശ്ശേരിയില്‍ പിടിയിലായിരുന്നു.