യോകോസുക: ഉത്തര കൊറിയക്കെതിരേ വീണ്ടും താക്കീതുമായി യു.എസ് വൈസ് പ്രസിഡന്റ് മൈക് പെന്‍സ്. വേണ്ടിവന്നാല്‍ ആണവായുധം പ്രയോഗിക്കുമെന്നും പെന്‍സ് വ്യക്തമാക്കി. ജപ്പാനിലെ യോകോസുകയില്‍ നങ്കൂരമിട്ട യു.എസ്.എസ് റോണാള്‍ഡ് റീഗണില്‍ നാവികസേനാംഗങ്ങളെ അഭിസംബോധന ചെയ്യുകയായിരുന്നു അദ്ദേഹം. വ്യോമവാഹിനികപ്പലാണ് യു.എസ്.എസ് റോണാള്‍ഡ് റീഗണ്‍.
അമേരിക്കയുടെ സൈനിക ശക്തി പരീക്ഷിക്കരുതെന്നും അത് അതിഭയാനകമായിരിക്കുമെന്നും പെന്‍സ് വ്യക്തമാക്കി. ഏഷ്യാ പസഫിക് മേഖലക്ക് ഉത്തര കൊറിയ ഭീഷണിയാണെന്നും അദ്ദേഹം പറഞ്ഞു.
ട്രംപിന്റെ ഭരണകൂടം ജാഗ്രതയോടെയാണ് പ്രവര്‍ത്തിക്കുന്നതെന്നും പ്യോങ്‌യാങ്ങിന്റെ കാര്യത്തില്‍ ചൈനയെയും ജപ്പാനെയും പോലെയുള്ള ശക്തികള്‍ നയതന്ത്ര സമ്മര്‍ദം ചെലുത്തുന്നുണ്ടെന്നും സൈനികരോട് തയാറായി നില്‍ക്കാന്‍ നിര്‍ദേശം നല്‍കിയിട്ടുണ്ടെന്നും അദ്ദേഹം വ്യക്തമാക്കി. അമേരിക്ക സമാധാനമാണ് ആഗ്രഹിക്കുന്നതെന്നും അദ്ദേഹം പറഞ്ഞു.