മനില: ബോക്‌സിങ് ഇതിഹാസം മാനി പാക്വിയാവോ റിങിലേക്ക് തിരിച്ചെത്തുന്നു. ഏപ്രിലില്‍ ബോക്‌സിങ് രംഗത്തു നിന്നു വിരമിക്കുകയാണെന്ന് പാക്വിയാവോ പ്രഖ്യാപിച്ചിരുന്നു. തിമോത്തി ബ്രാഡ്‌ലിക്കെതിരേ ജയം സ്വന്തമാക്കിയ ശേഷമായിരുന്നു പാക്വിയാവോയുടെ വിരമിക്കല്‍ പ്രഖ്യാപനം.
എന്നാല്‍ ലാസ് വേഗാസില്‍ ഒക്ടോബര്‍ 29, നവംബര്‍ 5 ദിവസങ്ങളില്‍ നടക്കുന്ന മത്സരങ്ങളിലൊന്നില്‍ മത്സരിക്കുമെന്ന് പാക്വിയാവോയുടെ പ്രമോട്ടര്‍ ബോബ് അരം വ്യക്തമാക്കി. ഫിലിപൈന്‍സ് പാര്‍ലമെന്റ് അംഗമായ പാക്വിയാവോ രാഷ്ട്രീയത്തിലുള്ള തിരക്കുകള്‍ കാരണമാണ് ബോക്‌സിങ് രംഗത്തു നിന്നു വിരമിച്ചതെന്ന് നേരത്തെ അഭ്യൂഹമുണ്ടായിരുന്നു. അദ്ദേഹത്തിന് തിരിച്ചുവരാന്‍ ആഗ്രഹമുണ്ടെന്ന് ബോബ് പറഞ്ഞു. എന്നാല്‍ പാക്വിയാവോയുടെ രാഷ്ട്രീയ കടമകള്‍ക്ക് കോട്ടം തട്ടാത്ത രീതിയില്‍ മാത്രമേ ബോക്‌സിങ് രംഗത്ത് നിലനില്‍ക്കുകയുള്ളൂവെന്നും ബോബ് കൂട്ടിച്ചേര്‍ത്തു.